نئی دہلی: مغربی دہلی کے تلک نگر علاقے میں 17 سالہ ایک لڑکے نے مبینہ طور پر خود کو گولی مار کر خودکشی کر لی۔ پولیس نے بدھ کے روز یہ اطلاع دی۔

پولیس کے مطابق یہ واقعہ منگل کی شام مغربی دہلی کے تلک نگر تھانے کے تحت آنے والے چوکھنڈی علاقے میں پیش آیا، جہاں لڑکے کا خاندان کرائے کے مکان میں رہتا ہے۔ پولیس نے بتایا کہ اس کی ٹیم کے موقع پر پہنچنے سے پہلے ہی نوجوان کو مردہ قرار دیا جا چکا تھا۔ ابتدائی تحقیقات سے معلوم ہوا ہے کہ لڑکے نے حال ہی میں بارہویں جماعت کا امتحان پاس کیا تھا۔

وہ اپنے والدین، ایک بھائی اور دو بہنوں کے ساتھ رہتا تھا اور بہن بھائیوں میں سب سے چھوٹا تھا۔ ایک پولیس افسر نے بتایا، "شام تقریباً پانچ بجے جب یہ واقعہ پیش آیا، اس وقت لڑکے کے والد اور ایک رشتہ دار گھر میں موجود تھے۔ نوجوان غسل خانے میں گیا اور 12 بور رائفل سے خود کو گولی مار لی۔" پولیس نے مقدمہ درج کر کے واقعے کی مزید تحقیقات شروع کر دی ہیں۔