دہلی اسٹیٹ حج کمیٹی عازمین کوہر طرح کی سہولیات بر وقت فراہم کرنے کے لئے پر عزم:کوثر جہاں

Story by  ATV | Posted by  [email protected] | Date 14-08-2025
دہلی اسٹیٹ حج کمیٹی عازمین کوہر طرح کی سہولیات بر وقت فراہم کرنے کے لئے پر عزم:کوثر جہاں
دہلی اسٹیٹ حج کمیٹی عازمین کوہر طرح کی سہولیات بر وقت فراہم کرنے کے لئے پر عزم:کوثر جہاں

 



 نئی دہلی: حج کمیٹی آف انڈیا کی جانب سے حج بیت اللہ 2026 کے عازمین حج کے انتخاب کے لئے آن لائن قرعہ اندازی میں جہاں پورے ہندوستان سے ایک لاکھ عازمین حج کا انتخاب ہوا ہے وہیں ریاست دہلی کے کل2071 حج امیدواروں کو اس مقدس سعادت حج بیت اللہ کے لیے منتخب کیا گیا ہے اس موقع پر منتخب ہونے والے عازمین کو مبارکباد پیش کرتے ہوے حج کمیٹی کی چیر پرسن کو ثر جہاں نے بتایا کہ دلی اسٹیٹ حج کمیٹی 2026 کے عازمین حج کو ہر طرح کی سہولیات بر وقت فراہم کرنے کے لئے پرعزم ہے۔

حج کمیٹی کے ایگزیکٹو آفیسر اشفاق احمد عارفی نے تفصیلات پیش کرتے ہوے بتایا کہ آن لائن قرعہ اندازی کے عمل کے ذریعے حج 2026 کے لیے منتخب ہونے والے کے2071 عازمین حج میں مخصوص زمرہ 65 سال سے زیادہ عمر کے364اور 65 سال سے زائد عمر کی بنا محرم خواتین مع ایک ساتھی زمرہ میں 2جبکہ 45 سال اور اس سے زیادہ کی بنا محرم خواتین کے زمرہ میں 21 اور عمومی زمرہ میں 1684 عازمین کا انتخاب ہوا ہے۔ ان تمام عازمین کو اب آیندہ 20 اگست تک حج اخراجات کی پیشگی رقم 152300 روپے فی کس حج کمیٹی آف انڈیا کی ویب سائٹ پر آن لائن یا اسٹیٹ بینک آف انڈیا یا یونین بینک آف انڈیا کے کسی بھی برانچ میں جمع کرنے کے بعد اپنے حج فارم کی پرنٹ کاپی پر دستخط کر کے اور سفید بیک گرانڈ کا رنگین فوٹوچسپاں کرکے، حلف نامہ، کینسل چیک،پاسپورٹ کی فوٹو کاپی اور، مقررہ پروفارمے میں میڈیکل سرٹیفکیٹ اور دیگر مطلوبہ دستاویزات منسلک کرکے حج کمیٹی کے دفتر، حج منزل میں جمع کرانا ضروری ہے۔

انہوں نے بتایا کہ حج کمیٹی عازمین کی سہولیات کے لیے انہیں میڈیکل سرٹیفکیٹ جاری کرنے کے لیے آصف علی روڈ پر واقع حج منزل میں،دلی سرکار کے محکمہ صحت کے تعاون سے میدیکل کیمپ کا اہتمام بھی کرے گی۔ جبکہ عازمین کسی بھی سرکاری اسپتال، ہیلتھ سینٹر یا محلہ کلینک کے سرکاری ایلوپیتھک ڈاکٹر سے میڈیکل سرٹیفکیٹ بنواکر جمع کر سکتے ہیں۔

واضح ہو کہ حج 2026 کے لیے دلی اسٹیٹ میں درخواست گزار عازمین کی تعداد4973 تھی جبکہ ریاست دہلی کی مسلم آبادی کے تناسب میں دلی میں حج عازمین کا کوٹہ1241ہے۔منتخب ہونے والے کل2071عازمین میں 834عازمین کا انتخاب دیگر ریاستوں سے باقی ماندہ حج کوٹے سے ملنے والی سیٹو ں سے ہوا ہے