نئی دہلی
مرکزی دہلی کے تکیہ کالے خاں علاقے میں آگ لگنے کے باعث کم از کم 30 جھونپڑیاں جل کر خاکستر ہو گئیں، جس کے بعد بڑے پیمانے پر بچاؤ مہم چلائی گئی اور پولیس نے 12 افراد کو خطرناک علاقے سے بحفاظت نکال لیا۔ ایک اہلکار نے منگل کو یہ جانکاری دی۔
اہلکار کے مطابق اس واقعے میں کسی کے زخمی ہونے کی اطلاع نہیں ملی ہے۔ آگ لگنے کی اصل وجہ تاحال معلوم نہیں ہو سکی۔دہلی فائر سروس (ڈی ایف ایس) کے مطابق پیر کی رات 11 بج کر 22 منٹ پر آگ لگنے کی اطلاع موصول ہونے کے بعد فائر بریگیڈ کی 24 گاڑیوں کو موقع پر روانہ کیا گیا۔
اہلکار نے بتایا کہ فائر بریگیڈ کے عملے کو آگ پر قابو پانے میں تقریباً تین گھنٹے لگے۔ڈی ایف ایس کے مطابق رات 12 بج کر 55 منٹ تک آگ پر قابو پا لیا گیا تھا، جس کے بعد علاقے میں ٹھنڈک برقرار رکھنے اور دوبارہ آگ بھڑکنے سے روکنے کے لیے کارروائی جاری رکھی گئی۔
ایک پولیس افسر نے بتایا کہ آگ اس مقام پر لگی جہاں پرانا فرنیچر، لکڑی اور دیگر آتش گیر سامان رکھا ہوا تھا، جس کے باعث گھنا دھواں پھیل گیا اور یہ خدشہ پیدا ہو گیا کہ آگ قریبی گھروں تک بھی پھیل سکتی ہے۔
اہلکار نے کہا کہ ٹیموں نے گھر گھر جا کر لوگوں کو محفوظ مقام پر منتقل کیا اور متاثرہ علاقے سے دور جانے پر آمادہ کیا۔ بروقت کارروائی کے نتیجے میں آگ مزید پھیلنے سے پہلے 12 افراد کو بحفاظت نکال لیا گیا۔
دہلی فائر سروس، بی ایس ای ایس اور دہلی ڈیزاسٹر مینجمنٹ اتھارٹی (ڈی ڈی ایم اے) کو فوری طور پر اطلاع دی گئی، جس کے بعد ان کے اہلکار موقع پر پہنچ گئے۔ احتیاطی تدابیر کے طور پر نو ایمبولینسیں بھی تعینات کی گئیں۔
آگ بجھانے کی کارروائی کے دوران ہجوم پر قابو پانے، لوگوں کے انخلا اور ہنگامی گاڑیوں کی بلا رکاوٹ آمد و رفت یقینی بنانے کے لیے اضافی پولیس اہلکار بھی طلب کیے گئے تھے۔
.webp "دہلی: آگ لگنے سے 30 جھونپڑیاں خاک")
