نئی دہلی/ آواز دی وائس

 دہلی کے معروف تاج پیلس ہوٹل کو ہفتہ کے روز بم دھماکے کی دھمکی والا ای میل موصول ہوا، جس کے بعد دہلی پولیس نے ہوٹل میں بڑے پیمانے پر تلاشی مہم چلائی۔ طویل جانچ کے بعد پولیس نے اسے جھوٹی دھمکی قرار دیا۔ اس واقعے سے ہوٹل کے مہمانوں اور عملے کو کچھ گھنٹوں تک پریشانی کا سامنا کرنا پڑا، لیکن کوئی خطرہ نہیں پایا گیا۔ دہلی پولیس کے مطابق، ہوٹل انتظامیہ کو صبح موصول ہونے والے ای میل میں بم دھماکے کی دھمکی دی گئی تھی۔ اس کے فوراً بعد پولیس کی ٹیمیں موقع پر پہنچیں اور ہوٹل کے تمام حصوں کی باریکی سے تلاشی لی، لیکن کچھ بھی برآمد نہیں ہوا۔

دہلی ہائی کورٹ کو بھی موصول ہوا تھا ای میل

قابل ذکر ہے کہ جمعہ کو دہلی ہائی کورٹ کو بھی ایک ای میل ملا تھا، جس میں ججوں کے کمروں اور عدالتوں میں دوپہر کے وقت دھماکے کی دھمکی دی گئی تھی۔ رجسٹرار جنرل کو صبح تقریباً 8:39 بجے یہ ای میل موصول ہوا۔ ای میل میں دعویٰ کیا گیا تھا کہ عدالت کے احاطے میں تین بم نصب کیے گئے ہیں اور دوپہر 2 بجے تک سب کو احاطہ خالی کر دینا چاہیے۔ ای میل میں لکھا تھا کہ دہلی ہائی کورٹ میں آج ہونے والا دھماکہ پچھلی دھمکیوں کے شکوک کو ختم کر دے گا۔‘‘ اس کے بعد ججوں، وکلاء اور فریقین کو عدالتوں سے محفوظ طور پر باہر نکالا گیا۔

اسکولوں کو بھی ملتی رہی ہے دھمکی

سب کو باہر نکالنے کے بعد پولیس اور دیگر ایجنسیوں نے پورے احاطے کی تلاشی لی، لیکن کچھ نہیں ملا۔ قابل ذکر ہے کہ دہلی میں حالیہ دنوں میں بم دھمکیوں کی تعداد میں اضافہ ہوا ہے۔ اگست میں 50 سے زیادہ اسکولوں کو  ای میل موصول ہوئے تھے، جن میں 25,000 ڈالر تاوان کا مطالبہ کیا گیا تھا۔ ان میں سے زیادہ تر دھمکیاں جھوٹی ثابت ہوئیں۔ یاد رہے کہ تاج پیلس ہوٹل، جو چانکیہ پوری میں واقع ہے، ایک اہم سیاحتی اور کاروباری مرکز ہے۔ پولیس نے عوام سے اپیل کی ہے کہ ایسی افواہوں پر کان نہ دھریں اور مشکوک سرگرمی کی اطلاع فوراً دیں۔