نئی دہلی/ آواز دی وائس
دہلی کی فضائی معیار میں بدھ کی صبح معمولی بہتری دیکھی گئی، تاہم فضائی معیار اشاریہ 273 ریکارڈ کیا گیا، جو کہ ’خراب‘ زمرے میں آتا ہے۔ یہ معلومات مرکزی آلودگی کنٹرول بورڈ (سی پی سی بی) نے فراہم کی ہیں۔ شہر میں منگل کی شام چار بجے اے کیو آئی 294 درج کیا گیا تھا، جو پیر کے روز ریکارڈ کیے گئے 301 سے کچھ کم ہے۔ پیر کا اشاریہ ’انتہائی خراب‘ زمرے میں شمار ہوتا ہے۔
سی پی سی بی کے "سمیر" ایپ کے اعداد و شمار سے ظاہر ہوا ہے کہ مجموعی بہتری کے باوجود دہلی کے 38 نگرانی مراکز میں سے 11 پر اے کیو آئی کی سطح 300 سے اوپر رہی، جو کہ ’انتہائی خراب‘ زمرے میں آتی ہے۔
سی پی سی بی کے مطابق، صفر سے 50 کے درمیان اے کیو آئی کو ’’بہترین‘‘، 51 سے 100 کے درمیان کو ’’اطمینان بخش‘‘، 101 سے 200 کے درمیان کو ’’درمیانہ‘‘، 201 سے 300 کے درمیان کو ’’خراب‘‘، 301 سے 400 کے درمیان کو ’’انتہائی خراب‘‘ اور 401 سے 500 کے درمیان کو ’’سنگین‘‘ قرار دیا جاتا ہے۔
ادھر، ہندوستانی محکمۂ موسمیات نے بتایا کہ قومی دارالحکومت میں کم سے کم درجہ حرارت 18.2 ڈگری سیلسیس ریکارڈ کیا گیا، جو معمول سے 2.1 ڈگری زیادہ ہے۔ زیادہ سے زیادہ درجہ حرارت تقریباً 28 ڈگری سیلسیس رہنے کا امکان ہے۔ محکمۂ موسمیات نے بدھ کو شہر میں ہلکی دھند چھائے رہنے کی پیش گوئی کی ہے۔
مزید بتایا کہ صبح ساڑھے آٹھ بجے نسبتی نمی 89 فیصد ریکارڈ کی گئی۔
