نئی دہلی: دہلی حکومت نے تقریباً ایک ہزار عمارتوں پر شمسی پینل (سولر پینلز) نصب کرنے کا منصوبہ تیار کیا ہے، جس کا مقصد 55 میگاواٹ بجلی پیدا کرنا ہے۔ حکام نے یہ اطلاع دی۔ ان کے مطابق، آنے والے مہینوں میں سینکڑوں اسکولوں، 40 سے زیادہ فائر اسٹیشنوں، دہلی جل بورڈ کے 24 دفتروں اور دہلی میونسپل کارپوریشن کی 70 سے زیادہ عمارتوں پر یہ سولر پینل لگائے جائیں گے۔

حکام نے بتایا کہ اس اقدام سے ہر سال بجلی کے بلوں میں 50 کروڑ روپے سے زیادہ کی بچت ہوگی اور کاربن کے اخراج میں 46 ہزار ٹن کاربن ڈائی آکسائیڈ کی کمی آئے گی۔ دہلی حکومت نے 500 مربع میٹر سے زیادہ رقبے والی اپنی تمام سرکاری عمارتوں کی چھتوں پر سولر پینل لگانا لازمی قرار دیا ہے۔

حکام کے مطابق، ایسی 3,880 سرکاری عمارتوں میں سے 1,200 سے زیادہ پر پہلے ہی سولر پینل نصب کیے جا چکے ہیں۔ گزشتہ ماہ شمال مغربی دہلی کے رتھالا علاقے میں ایک پروگرام کے دوران وزیر اعلیٰ ریکھا گپتا نے ایک ہزار سرکاری عمارتوں کی چھتوں پر سولر پینل لگا کر 55 میگاواٹ بجلی پیدا کرنے کے منصوبے کا آغاز کیا۔

رتھالا کے سیویج ٹریٹمنٹ پلانٹ میں 25 کلوواٹ کے شمسی توانائی کے پلانٹ کا افتتاح کرتے ہوئے انہوں نے کہا، "یہ منصوبہ اگلے سال جنوری تک مکمل ہو جائے گا۔ سرکاری عمارتوں کو شمسی توانائی سے منسلک کرنے کا عمل آنے والے دنوں میں تیزی سے شروع کیا جائے گا۔"