نئی دہلی: دہلی حکومت نے دارالحکومت کے عوامی نقل و حمل کے نظام کو مزید مضبوط اور جدید بنانے کی سمت ایک بڑا قدم اٹھایا ہے۔ وزیر اعلیٰ کی صدارت میں منعقدہ کابینہ اجلاس میں میٹرو فیز–V(اے) کو منظوری دے دی گئی ہے۔ اس اہم منصوبے کے تحت مجموعی طور پر 16 کلومیٹر طویل تین نئے کوریڈور تیار کیے جائیں گے، جن میں 13 میٹرو اسٹیشن شامل ہوں گے۔

اس پورے منصوبے کی تخمینی لاگت 12,014.91 کروڑ روپے ہے، جس میں دہلی حکومت کا حصہ 2,940.46 کروڑ روپے مقرر کیا گیا ہے۔ اس منصوبے کو سال 2028 تک مکمل کرنے کا ہدف رکھا گیا ہے۔ وزیر اعلیٰ نے کہا کہ یہ منصوبہ نقل و حمل سے متعلق وزیر اعظم کے ’7-سی وژن‘ کو عملی جامہ پہنانے کی سمت ایک اہم قدم ہے، جس کا مطلب ہے— مشترکہ، آسان، سہل، جام سے پاک، توانائی بخش، صاف اور جدید ترین ٹرانسپورٹ۔

انہوں نے کہا کہ ماحولیاتی تحفظ اور نیٹ زیرو اخراج کے اہداف حاصل کرنے کے لیے عوامی ٹرانسپورٹ کو مضبوط بنانا ناگزیر ہے اور یہ توسیع اس سمت میں سنگ میل ثابت ہوگی۔ انہوں نے اسے دہلی کے مستقبل میں سرمایہ کاری قرار دیتے ہوئے کہا کہ نئے کوریڈور نہ صرف ٹریفک کا دباؤ کم کریں گے بلکہ آلودگی پر قابو پانے میں بھی مددگار ثابت ہوں گے۔

منظور شدہ تین کوریڈور میں آر کے آشرم سے اندرپرستھ (سینٹرل وسٹا کے راستے)، تغلق آباد سے کالندی کنج اور ایرو سٹی سے اندرا گاندھی ڈومیسٹک ٹرمینل-1 (IGD T-1) شامل ہیں۔ کل 13 اسٹیشنوں میں سے 10 زیرِ زمین اور 3 ایلیویٹڈ ہوں گے۔ یہ توسیع موجودہ میٹرو نیٹ ورک کے ساتھ بغیر رکاوٹ انٹرچینج کی سہولت فراہم کرے گی اور ہوائی اڈے، تجارتی مراکز اور رہائشی علاقوں کے درمیان رابطہ مزید بہتر بنائے گی۔

فیز-5(اے) کا سب سے اہم کوریڈور آر کے آشرم مارگ سے اندرپرستھ تک مجوزہ ہے، جس کی کل لمبائی 9.913 کلومیٹر ہے۔ اس لائن پر 9 اسٹیشن بنائے جائیں گے۔ یہ کوریڈور سینٹرل وسٹا علاقے سے گزرے گا اور دہلی کے انتظامی، ثقافتی اور تاریخی علاقوں کو براہِ راست میٹرو نیٹ ورک سے جوڑے گا۔

یہ راستہ تمام سرکاری عمارتوں کو آپس میں مربوط کرے گا، جس سے یہاں کام کرنے والے تقریباً 60 ہزار ملازمین اور روزانہ قریب 2 لاکھ مسافروں کو فائدہ ہوگا۔ اس منصوبے پر 9,570.40 کروڑ روپے خرچ ہوں گے، جن میں سے 2,337.24 کروڑ روپے دہلی حکومت ادا کرے گی۔ یہ کوریڈور 2.26 کلومیٹر طویل ہوگا اور اس میں ایک اسٹیشن شامل ہوگا۔

یہ منصوبہ ہوائی مسافروں کے لیے نہایت مفید ثابت ہوگا اور ایئرپورٹ تک تیز اور براہِ راست میٹرو رسائی فراہم کرے گا۔ اس سے نجی گاڑیوں اور ٹیکسیوں پر انحصار کم ہوگا اور ایئرپورٹ کے اطراف ٹریفک کا دباؤ گھٹے گا۔ اس منصوبے کی لاگت 1,419.64 کروڑ روپے ہے، جس میں دہلی حکومت 351.86 کروڑ روپے فراہم کرے گی۔

یہ کوریڈور 3.9 کلومیٹر طویل ہوگا اور اس میں 3 اسٹیشن شامل ہوں گے۔ یہ جنوبی اور جنوب مشرقی دہلی کے علاقوں کو بہتر میٹرو سہولت فراہم کرے گا اور مقامی مسافروں کے لیے سفر کو زیادہ آسان بنائے گا۔ اس منصوبے کی لاگت 1,024.87 کروڑ روپے ہوگی، جس میں سے 251.36 کروڑ روپے دہلی حکومت برداشت کرے گی۔