نئی دہلی: دہلی میں 2026-27 کی ایکسائز مدت کے لیے لائسنس فیس میں 10 فیصد اضافہ کر دیا گیا ہے۔ یہ اضافہ ہوٹل، کلب اور ریستوران سمیت مختلف زمروں کے لائسنسوں پر لاگو ہوگا۔ دہلی حکومت کے محکمہ آبکاری، تفریح اور لگژری ٹیکس نے یکم اپریل 2026 سے 31 مارچ 2027 تک کی لائسنس مدت کے لیے فیس بڑھانے کا حکم جاری کیا ہے۔

مجاز اتھارٹی کی منظوری کے بعد ایل-28/ایل-28 ایف اور ایل-29/ایل-29 ایف زمرے کے لائسنسوں کی تجدید کی اجازت دے دی گئی ہے۔ نئی پالیسی کے تحت ہندوستانی اور غیر ملکی شراب پر عائد سالانہ لائسنس فیس میں 10 فیصد اضافہ کیا گیا ہے۔ اندازہ ہے کہ لائسنس فیس میں اضافے کا اثر بازار میں شراب کی قیمتوں پر بھی پڑ سکتا ہے۔ تمام لائسنس ہولڈرز کو ای-ایکسائز پورٹل پر اپنی اے ایکس ڈی آئی ڈی کے ذریعے آن لائن درخواست دے کر تجدید کرانی ہوگی۔

محکمہ نے ادائیگی کی آخری تاریخ بھی مقرر کر دی ہے۔ 28 فروری تک صرف اصل لائسنس فیس ادا کرنی ہوگی۔ یکم مارچ سے 31 مارچ کے درمیان ادائیگی کرنے پر 25 فیصد اضافی فیس عائد ہوگی۔ یکم اپریل کے بعد ادائیگی کرنے پر 100 فیصد اضافی فیس دینا ہوگی۔ محکمہ نے واضح کیا ہے کہ مقررہ وقت پر فیس جمع نہ کرانے کی صورت میں ٹرانسپورٹ پرمٹ روکا جا سکتا ہے یا دیگر کارروائی کی جا سکتی ہے۔