نئی دہلی: دہلی حکومت نے خواتین کو مالی امداد فراہم کرنے والی "دہلی لکشمی یوجنا" کو منگل کے روز منظوری دے دی۔ وزیر اعلیٰ ریکھا گپتا کی صدارت میں منعقدہ کابینہ کی میٹنگ میں اس اسکیم کی منظوری دی گئی۔ اس منصوبے کے تحت مستحق خواتین کو 2,500 روپے کی مالی امداد دی جائے گی۔

ریکھا گپتا نے کہا، "دہلی لکشمی یوجنا کو کابینہ نے منظوری دے دی ہے اور اس کے لیے یکم اگست سے آن لائن پورٹل شروع کیا جائے گا۔" ان کے مطابق، حکومت کو امید ہے کہ درخواستوں کی جانچ مکمل ہونے کے بعد رکشا بندھن تک امداد کی پہلی قسط جاری کر دی جائے گی۔ مجوزہ ضوابط کے مطابق، درخواست گزار خواتین کو ایک خود اقراری حلف نامہ جمع کرانا ہوگا، جس میں یہ ظاہر کرنا ہوگا کہ وہ کم از کم 10 برس سے دہلی کی رہائشی ہیں اور ان کے خلاف کوئی مجرمانہ ریکارڈ موجود نہیں ہے۔