نئی دہلی: وزیراعظم نریندر مودی کی 75ویں سالگرہ کے موقع پر دہلی حکومت کے 15 روزہ ’’سیوا پکھواڑا‘‘ کے تحت جمعرات کو دہلی کے سنٹرل رِج میں 70 ملکوں کے سفارتکاروں نے پودے لگائے۔ اس پروگرام میں کل 75 سفارتکار شریک ہوئے۔

اس دوران مرکزی وزیر ماحولیات بھوپندر یادو، دہلی کی وزیر اعلیٰ ریکھا گپتا اور دہلی کے وزیر ماحولیات منجندر سنگھ سرسا بھی موجود تھے۔ وزیراعظم مودی کی سالگرہ پر بدھ کے روز مرکزی وزیر داخلہ امیت شاہ نے دہلی حکومت کے 17 منصوبوں اور اسکیموں کا افتتاح کیا۔ بی جے پی حکومت ’’سیوا پکھواڑا‘‘ کے دوران دہلی میں کل 75 ترقیاتی منصوبوں اور فلاحی اقدامات کا آغاز کرے گی، جو دو اکتوبر کو مکمل ہوگا۔

وزیراعظم نریندر مودی کی سالگرہ (17 ستمبر) کے موقع پر بی جے پی کی جانب سے ہر سال ’’سیوا پکھواڑا‘‘ یعنی خدمت کے دو ہفتے منائے جاتے ہیں۔ اس کا مقصد سماجی بہبود، عوامی سہولتوں اور ترقیاتی اقدامات کو فروغ دینا ہوتا ہے۔ اس سال، چونکہ مودی نے اپنی 75ویں سالگرہ منائی ہے، اس لیے دہلی سمیت پورے ملک میں 75 خصوصی پروگرام اور منصوبے شروع کیے گئے ہیں۔

پودے لگانے کی یہ تقریب اسی مہم کا حصہ تھی، جس میں غیر ملکی سفارتکاروں کو بھی شامل کیا گیا تاکہ ماحولیات کے تحفظ اور بین الاقوامی تعاون کا پیغام دیا جا سکے۔ دہلی کے سنٹرل رِج کو دارالحکومت کے ’’سبز پھیپھڑے‘‘ کہا جاتا ہے، اس لیے وہاں شجرکاری کو خاص اہمیت دی گئی۔