نئی دہلی:دہلی کانگریس کے کئی سینئر رہنماؤں نے بدھ کے روز شہر میں خطرناک فضائی آلودگی کی صورتحال پر اپنا احتجاج درج کراتے ہوئے پریس کانفرنس میں ماسک پہن کر اور آکسیجن سلنڈر لے کر شرکت کی۔ انہوں نے دہلی کی بھارتیہ جنتا پارٹی (بی جے پی) حکومت سے مطالبہ کیا کہ وہ شہر کو اس ’’صحت ایمرجنسی‘‘ سے باہر نکالے۔

دہلی پردیش کانگریس کمیٹی کے صدر دیویندر یادو، پارٹی کے دہلی انچارج قاضی نظام الدین، سابق وزیر ہارون یوسف اور دیگر کئی رہنماؤں نے منفرد انداز میں اپنا احتجاج ظاہر کیا۔ بعد ازاں وہ دہلی سیکریٹریٹ پہنچے، جہاں انہوں نے احتجاج کیا اور حکومت کو ایک میمورنڈم (تحریری مطالبہ نامہ) پیش کیا۔

بدھ کی صبح قومی دارالحکومت میں فضائی معیار کا اشاریہ (AQI) 335 ریکارڈ کیا گیا، جو ’’بہت خراب‘‘ کیٹیگری میں آتا ہے۔ دہلی گزشتہ کئی روز سے مسلسل شدید فضائی آلودگی کا سامنا کر رہی ہے۔ دیویندر یادو نے کہا کہ وہ اس صورتحال پر دہلی حکومت کو ایک میمورنڈم دیں گے۔ انہوں نے کہا، ’’جیسا کہ آپ دیکھ سکتے ہیں، ہمارے رہنما یہاں آکسیجن سلنڈر کے ساتھ بیٹھے ہیں۔ فی الحال یہ علامتی ہے، لیکن دہلی جس حالت میں ہے، وہ دن دور نہیں جب ہر شخص کو زندہ رہنے کے لیے اپنے ساتھ آکسیجن سلنڈر رکھنا پڑے گا۔‘‘ تعمیراتی مزدوروں کی حالت کا ذکر کرتے ہوئے یادو نے کہا، ’’GRAP کے تیسرے مرحلے کے نافذ ہوتے ہی تعمیراتی سرگرمیوں پر پابندی لگ جاتی ہے۔

ایک طرف وہ آلودگی سے پریشان ہیں اور دوسری طرف ان کی روزانہ کی مزدوری چھن جانے کا بوجھ بھی ہے۔‘‘ انہوں نے کہا کہ اسپتال سانس کی بیماریوں میں مبتلا مریضوں سے بھرے ہوئے ہیں۔ یادو نے کہا کہ دہلی کی وزیراعلیٰ ریکھا گپتا نے آلودگی کی سطح کم کرنے کا وعدہ کیا تھا۔

انہوں نے دہلی کی سابق وزیراعلیٰ شیلا دیکشت کی کارکردگی یاد کرتے ہوئے کہا کہ ان کے دورِ حکومت میں ماحولیات سے متعلق مسائل پر مؤثر کنٹرول تھا۔ یادو نے الزام لگایا کہ دہلی سیکریٹریٹ میں وزیراعلیٰ نے کانگریس رہنماؤں سے ملاقات نہیں کی، اور پارٹی کو اپنا میمورنڈم ماحولیات کے سیکریٹری کو دینا پڑا۔