وارانسی: جیوتیرمٹھ کے شنکرآچاریہ سوامی ابھیموکتیشورانند سرسوتی کو جان سے مارنے کی دھمکی دینے کے معاملے میں وارانسی کے بھیلپور تھانے میں ہفتہ کے روز نامعلوم شخص کے خلاف مقدمہ درج کر لیا گیا ہے۔ پولیس نے یہ اطلاع دی۔

پولیس کے مطابق سوامی ابھیموکتیشورانند سرسوتی کو دھمکی دینے کے کیس میں بھیلپور تھانے میں بھارتیہ نیائے سنہیتا (بی این ایس) کی دفعہ 351(4) اور 352 کے تحت مقدمہ درج کیا گیا ہے۔ ایڈیشنل پولیس کمشنر گورو کمار نے کہا کہ اس معاملے میں تحریری شکایت اور شواہد کی بنیاد پر مقدمہ درج کیا گیا ہے۔

انہوں نے بتایا کہ جس نمبر سے دھمکی آمیز پیغام بھیجا گیا تھا اس کی شناخت کی جا رہی ہے اور قصوروار کے خلاف سخت کارروائی کی جائے گی۔ شنکرآچاریہ کے میڈیا انچارج سنجے پانڈے نے بدھ کے روز بتایا تھا کہ جیوتیرمٹھ کے سرکاری نمبر پر یکم اپریل کو ایک مشتبہ شخص کی جانب سے کئی قابل اعتراض اور دھمکی آمیز پیغامات بھیجے گئے تھے۔

انہوں نے کہا کہ نمبر بلاک کرنے کے بعد 6 اپریل کو وائس میل کے ذریعے دو بار آڈیو دھمکی آمیز پیغامات موصول ہوئے، جن میں نازیبا زبان استعمال کرتے ہوئے شنکرآچاریہ کو جان سے مارنے کی دھمکی دی گئی۔ اس کے بعد سوامی ابھیموکتیشورانند کے میڈیا انچارج نے وارانسی کے بھیلپور تھانے میں تحریری شکایت درج کرائی تھی۔