نئی دہلی: نویَن و تجدید پذیر توانائی کی وزارت (ایم این آر ای) نے ہفتہ کے روز ایک اسٹارٹ اپ انوویشن چیلنج کا اعلان کیا ہے جس کی کل انعامی رقم 2.3 کروڑ روپے ہے۔ اس چیلنج کا مقصد ملک میں چھت پر سولر پینلز کی تنصیب کو فروغ دینا اور تجدید پذیر توانائی کو اپنانے کی رفتار میں اضافہ کرنا ہے۔

وزارت کی جانب سے جاری ایک بیان میں کہا گیا ہے کہ اس انوویشن چیلنج کا مقصد ہندوستان میں چھت پر نصب کیے جانے والے شمسی توانائی (روف ٹاپ سولر) اور تقسیم شدہ تجدید پذیر توانائی کے ماحولیاتی نظام کے لیے مؤثر حل تلاش کرنا اور ان کی حمایت کرنا ہے۔

یہ چیلنج، ایم این آر ای کی نگرانی میں نیشنل انسٹی ٹیوٹ آف سولر انرجی (این آئی ایس ای) کے تعاون سے، اور اسٹارٹ اپ انڈیا و ڈی پی آئی آئی ٹی کے اشتراک سے عمل میں لایا جا رہا ہے۔ بیان کے مطابق، تجدید پذیر توانائی سے متعلق ورک فورس کے لیے منعقدہ ایک قومی کانفرنس کے دوران اس چیلنج کا آغاز کیا گیا، جو روف ٹاپ سولر (آر ٹی ایس) اور تقسیم شدہ تجدید پذیر توانائی (ڈی آر ای) ٹیکنالوجیز پر مبنی ایک اختراعی منصوبہ ہے۔

اس چیلنج کے تحت ہندوستان بھر کے موجدین اور اسٹارٹ اپس سے درخواستیں طلب کی گئی ہیں، جو قابل تجدید توانائی کو فروغ دینے کے لیے چار کلیدی شعبوں — سستی، لچک، شمولیت، اور ماحولیاتی پائیداری — پر توجہ مرکوز کریں۔ یہ چیلنج سبز ٹیکنالوجی، انٹرنیٹ آف تھنگز (آئی او ٹی)، مصنوعی ذہانت (اے آئی)، بلاک چین، مینوفیکچرنگ، توانائی کے ہارڈ ویئر، فِن ٹیک، اور ویسٹ مینجمنٹ جیسے شعبوں میں کام کرنے والے اسٹارٹ اپس کے لیے کھلا ہے۔

درخواست دہندگان کل 2.3 کروڑ روپے کی انعامی رقم کے لیے مقابلہ کریں گے، جس میں اول انعام کے طور پر ایک کروڑ روپے، دوم انعام کے طور پر 50 لاکھ روپے، سوم انعام کے طور پر 30 لاکھ روپے، اور 5 لاکھ روپے کے 10 انعامات شامل ہیں۔