نئی دہلی: الیکشن کمیشن کے مطابق مغربی بنگال میں جاری اسمبلی انتخابات کے دوران پیر تک غیر قانونی ترغیبات کے تحت مجموعی طور پر 510 کروڑ روپے سے زائد کی برآمدگی کی گئی ہے۔ حکام کے مطابق یہ برآمدگی 2021 کے گزشتہ اسمبلی انتخابات کے دوران پکڑی گئی رقم (339 کروڑ روپے) سے بھی زیادہ ہے۔

مزید بتایا گیا ہے کہ یہ رقم 2024 کے لوک سبھا انتخابات کے دوران ہونے والی ضبطی سے بھی زیادہ ہے۔ انتخابات کا پہلا مرحلہ 23 اپریل کو ہوا تھا جبکہ دوسرا مرحلہ بدھ کو منعقد ہوگا۔ برآمدگی میں 30 کروڑ روپے نقد، 126.85 کروڑ روپے مالیت کی 48,000 لیٹر سے زیادہ شراب، 110.12 کروڑ روپے مالیت کی منشیات اور 58.28 کروڑ روپے مالیت کی قیمتی دھاتیں شامل ہیں۔

حکام کے مطابق ووٹروں کو لالچ دینے کے لیے سونا اور چاندی جیسی قیمتی دھاتوں کا بھی استعمال کیا جاتا ہے۔ اس کے علاوہ، قانون نافذ کرنے والے اداروں نے 184.85 کروڑ روپے مالیت کا مفت سامان بھی ضبط کیا ہے، جس میں گھریلو اشیاء، کپڑے اور موبائل فون شامل ہو سکتے ہیں۔ پریس ریلیز کے مطابق مغربی بنگال سمیت کیرالہ، آسام، پڈوچیری اور تمل ناڈو کے لیے انتخابی شیڈول 15 مارچ کو جاری کیا گیا تھا جبکہ ووٹوں کی گنتی 4 مئی کو ہوگی