نئی دہلی

مرکزی وزیرِ صحت جے پی نڈا نے منگل کو بتایا کہ رواں سال 3 فروری تک بچوں اور حاملہ خواتین کی معمول کی ویکسینیشن کے انتظام اور نگرانی کے لیے قائم کیے گئے یو-وِن  پورٹل پر 11.05 کروڑ بچے اور 3.75 کروڑ حاملہ خواتین رجسٹرڈ ہیں۔

راجیہ سبھا میں ایک سوال کے تحریری جواب میں جے پی نڈا نے کہا کہ ہر مستفید فرد یو-وِن پورٹل سے کیو آر کوڈ پر مبنی ویکسینیشن سرٹیفکیٹ ڈاؤن لوڈ کر سکتا ہے۔ انہوں نے بتایا کہ سال 2025 میں 8.01 کروڑ مستفید افراد کو یو-وِن پورٹل پر رجسٹر کیا گیا اور انہیں کیو آر کوڈ پر مبنی ویکسینیشن سرٹیفکیٹس فراہم کیے گئے۔

نڈا کے مطابق، 2025 کے دوران یو-وِن پورٹل کے ذریعے مجموعی طور پر 29.42 کروڑ ایس ایم ایس بھیجے گئے، جن میں ویکسینیشن سے متعلق یاددہانی کے پیغامات بھی شامل تھے۔ مرکزی وزیرِ صحت نے وضاحت کی کہ یو-وِن پورٹل نے ویکسینیشن کے مستحق بچوں کی فہرست سازی (لائن لسٹنگ) میں اہم کردار ادا کیا ہے۔ ان بچوں کو پورٹل پر ڈیجیٹل طور پر نقش کیا جاتا ہے، تاکہ ایس ایم ایس الرٹس کے ذریعے باقاعدہ فالو اپ ممکن ہو سکے اور انہیں مقررہ خوراکیں وقت پر دی جا سکیں۔

انہوں نے کہا کہ ان بچوں کی نشاندہی فرنٹ لائن کارکنان بھی کرتے ہیں، جس کے بعد انہیں مطلوبہ ویکسین فراہم کی جاتی ہے اور اس کا اندراج یو-وِن پلیٹ فارم پر کیا جاتا ہے، تاکہ اس بات کو یقینی بنایا جا سکے کہ وہ اپنی معمول کی حفاظتی ٹیکہ کاری مکمل کریں۔