نئی دہلی،:سپریم کورٹ 31 اگست کو اس عرضی پر سماعت کرے گی جس میں مرکز اور دیگر متعلقہ فریقوں کو ہدایت دینے کی درخواست کی گئی ہے کہ پٹرول پمپوں پر پٹرول میں ایتھنول کی صحیح مقدار بتانے کا نظام یقینی بنایا جائے۔ سپریم کورٹ کی 31 اگست کی مقدمات کی فہرست کے مطابق، اس عرضی پر جسٹس ایم. ایم. سندریش اور جسٹس پرسنّا بی. ورالے کی بنچ سماعت کرے گی۔

نریندر کمار گوسوامی کی جانب سے دائر عرضی میں یہ ہدایت دینے کی بھی درخواست کی گئی ہے کہ ایندھن کے ہر بل پر فروخت کیے گئے پٹرول میں ایتھنول کی فیصد واضح اور آسانی سے پڑھی جانے والی شکل میں درج کی جائے۔ عرضی میں مطالبہ کیا گیا ہے کہ مرکز اور دیگر متعلقہ فریقوں کو مقررہ مدت کے اندر گاڑیوں کے لیے ایتھنول کے مختلف مرکبات کی موزونیت سے متعلق ایک سرکاری اور عوامی ڈیٹا بیس تیار کرکے شائع کرنے کی ہدایت دی جائے۔

اس ڈیٹا بیس میں گاڑی کے لحاظ سے معلومات موجود ہوں اور اسے مینوفیکچرر، ماڈل، انجن کی قسم اور تیاری کے سال کی بنیاد پر تلاش کیا جا سکے۔ عرضی میں ایک آزاد ماہر کمیٹی تشکیل دینے کی بھی درخواست کی گئی ہے، جس میں وزارت پٹرولیم و قدرتی گیس، وزارت سڑک ٹرانسپورٹ و شاہراہیں، بیورو آف انڈین اسٹینڈرڈز اور دیگر ماہرین، مثلاً آزاد آٹو موبائل انجینئرز، شامل ہوں۔ عرضی میں کہا گیا ہے کہ یہ کمیٹی موجودہ گاڑیوں میں ’ای20‘ کے استعمال کی حقیقی صورتحال کا جائزہ لے اور اس سلسلے میں عوامی رپورٹ پیش کرے۔