نئی دہلی: سپریم کورٹ نے منگل کو صحافی ترون تیج پال کی وہ درخواست مسترد کر دی، جس میں انہوں نے 2013 کے عصمت دری کے مقدمے میں بمبئی ہائی کورٹ کی جانب سے 10 سال کی سخت قید کی سزا سنائے جانے کے بعد خودسپردگی سے راحت کی درخواست کی تھی۔

جسٹس آلوک آرادھے کی بنچ نے تیج پال کو دو ہفتوں کے اندر خودسپردگی کرنے کی ہدایت دی۔ بنچ نے سزا اور جرم ثابت ہونے کے خلاف دائر ان کی اپیل کو 22 ستمبر کو سماعت کے لیے فہرست میں شامل کیا ہے، تاہم اس کے لیے انہیں پہلے خودسپردگی کا سرٹیفکیٹ جمع کرانا ہوگا۔ بمبئی ہائی کورٹ نے 6 اگست کو میگزین ’تہلکہ‘ کے سابق ایڈیٹر ترون تیج پال کو 2013 میں ایک ساتھی خاتون سے عصمت دری کا مجرم قرار دیتے ہوئے 10 سال کی سخت قید کی سزا سنائی تھی۔

ہائی کورٹ نے گوا کی ایک سیشن عدالت کے پانچ سال قبل تیج پال کو بری کرنے کے فیصلے کو منسوخ کر دیا تھا۔ یہ معاملہ نومبر 2013 میں گوا میں منعقدہ ’تھنک فیسٹ‘ پروگرام کے دوران ایک ہوٹل کی لفٹ میں تیج پال کی ایک سابق جونیئر خاتون ساتھی کے جنسی استحصال سے متعلق ہے۔ نچلی عدالت نے 2021 میں تیج پال کو اس معاملے میں بری کر دیا تھا، جس کے خلاف گوا حکومت نے بمبئی ہائی کورٹ میں اپیل دائر کی تھی۔