نئی دہلی: دہلی ہائی کورٹ نے منگل کو پتنجلی آیوروید کو اس کے ایک اشتہار کے کچھ حصے ہٹانے کا حکم دیا، جس میں مبینہ طور پر ڈابر کمپنی کے چوان پراش کو کمتر دکھایا گیا تھا۔ جسٹس ہری شنکر اور جسٹس اوم پرکاش شکلہ کی بنچ نے پتنجلی کو ’’سادہ چوان پراش سے ہی کیوں مطمئن ہوں‘‘ والے جملے کے استعمال کی اجازت دی، لیکن اس میں سے ’’40 جڑی بوٹیوں سے تیار‘‘ والا حصہ ہٹانے کا حکم دیا۔
یہ حکم پتنجلی کی اُس اپیل پر آیا جو اس نے سنگل جج کے حکم کے خلاف دائر کی تھی۔ اس حکم میں پتنجلی کو ڈابر چوان پراش کے خلاف ’توہین آمیز‘ اشتہار نشر کرنے سے روک دیا گیا تھا۔ سنگل جج نے جولائی میں ڈابر انڈیا لمیٹڈ کی طرف سے دائر عبوری درخواست منظور کرتے ہوئے پتنجلی کو اشتہار کی اس لائن کو ہٹانے کا کہا تھا: ’’40 جڑی بوٹیوں سے بنے سادہ چوان پراش سے ہی کیوں مطمئن ہوں؟‘‘
عدالت کی بنچ نے پتنجلی کو ٹی وی اشتہار سے یہ جملہ بھی ہٹانے کا حکم دیا: ’’جن کو آیوروید اور ویدوں کا علم نہیں، چرک، سُشرت، دھنونتری اور چَون رِشی کی روایت کے مطابق اصلی چوان پراش کیسے بنا پائیں گے؟‘‘ پتنجلی کے وکیل نے عدالت کو بتایا کہ کمپنی ’’40 جڑی بوٹیوں سے تیار‘‘ کا حوالہ ہٹا دے گی اور انہوں نے ’’سادہ چوان پراش‘‘ کے ذکر کی اجازت دینے کی درخواست کی۔
وکیل نے کہا کہ کمپنی اُس دوسرے حصے کی اجازت نہیں مانگ رہی جس پر ایکل جج نے پابندی لگائی تھی۔ بنچ نے کہا کہ اگر 40 جڑی بوٹیوں والا حوالہ ہٹا دیا جاتا ہے تو باقی محض ایک بیان رہ جاتا ہے: ’’سادہ چوان پراش سے ہی کیوں مطمئن ہوں؟‘‘
بنچ نے کہا: ’’ہم یہاں چوان پراش کی بات کر رہے ہیں، کسی ڈاکٹر کے نسخے والی دوا کی نہیں۔ اگر کوئی کینسر کی دوا کے لیے ’سادہ‘ جیسا لفظ کہے تو یہ سنگین بات ہوگی۔ لیکن چوان پراش تو عام لوگ استعمال کرتے ہیں… یہ کہنا کہ ’میں سب سے بہتر ہوں اور باقی میرے جتنے اچھے نہیں‘ محض مبالغہ ہے۔ ہمیں نہیں لگتا کہ ’سادہ‘ لفظ کی وجہ سے لوگ ڈابر چوان پراش لینا بند کر دیں گے۔‘‘ جسٹس منی پشکرنا نے پتنجلی کو ’’تو سادہ چون پراش کیوں؟‘‘ والا جملہ ہٹانے کا حکم دیا تھا۔
بنچ نے کہا کہ ترمیم کے بعد پتنجلی کو پرنٹ اور ٹی وی اشتہار چلانے کی اجازت دی جانی چاہیے۔ اپنی عرضداشت میں پتنجلی نے دعویٰ کیا کہ اس کے اشتہار میں ڈابر کا کوئی ذکر نہیں تھا۔ 3 جولائی کے حکم میں عدالت نے کہا تھا کہ ٹی وی اشتہار کا بیان خود رام دیو نے کیا تھا، جو اشتہار میں خود بھی نظر آئے تھے۔
