نئی دہلی: دہلی ہائی کورٹ نے بدھ کے روز سابق وزیر اعلیٰ اروند کیجریوال سے انفورسمنٹ ڈائریکٹوریٹ (ای ڈی) کی اس درخواست پر ان کا مؤقف طلب کیا ہے، جس میں انہیں آبکاری پالیسی کیس میں جاری سمن کے باوجود تفتیشی ایجنسی کے سامنے پیش نہ ہونے کے سبب درج دو الگ الگ مقدمات میں بری کیے جانے کے فیصلے کو چیلنج کیا گیا ہے۔

جسٹس سورن کانتا شرما نے نچلی عدالت کے 22 جنوری کے احکامات کے خلاف ای ڈی کی جانب سے دائر دو درخواستوں پر عام آدمی پارٹی (آپ) کے رہنما کو نوٹس جاری کیا اور سماعت 29 اپریل کے لیے مقرر کر دی۔ عدالت نے کہا، "مدعا علیہ نے پیشگی اطلاع ملنے کے باوجود حاضر نہ ہونے کا انتخاب کیا۔ نیا نوٹس جاری کیا جائے اور 29 اپریل کو سماعت کے لیے فہرست میں شامل کیا جائے۔

انفورسمنٹ ڈائریکٹوریٹ نے نچلی عدالت میں اپنی شکایت میں الزام لگایا ہے کہ کیجریوال نے جان بوجھ کر سمن کی تعمیل نہیں کی اور تفتیش میں شامل نہیں ہوئے۔ ای ڈی کے مطابق، سابق وزیر اعلیٰ نے بے بنیاد اعتراضات اٹھائے اور دانستہ طور پر ایسی دلیلیں پیش کیں تاکہ وہ تفتیش میں شامل ہونے سے بچ سکیں۔

تاہم، نچلی عدالت نے اپنے فیصلے میں کہا تھا کہ ای ڈی یہ ثابت کرنے میں ناکام رہی ہے کہ کیجریوال نے جان بوجھ کر سمن کی خلاف ورزی کی۔ ای ڈی کا یہ بھی الزام ہے کہ اس معاملے کے دیگر ملزمان کیجریوال کے رابطے میں تھے اور انہوں نے اب منسوخ کی جا چکی آبکاری پالیسی تیار کرنے میں تعاون کیا، جس کے بدلے انہیں ناجائز فائدہ ملا اور عام آدمی پارٹی کو رشوت حاصل ہوئی۔

کیجریوال اس وقت منی لانڈرنگ کیس میں عبوری ضمانت پر ہیں۔ سپریم کورٹ نے منی لانڈرنگ روک تھام ایکٹ (پی ایم ایل اے) کے تحت "گرفتاری کی ضرورت" سے متعلق سوالات کو تفصیلی غور و خوض کے لیے ایک بڑی بنچ کے حوالے کر دیا ہے۔

نچلی عدالت نے 27 فروری کو آبکاری پالیسی کیس میں کیجریوال، منیش سسودیا اور 21 دیگر افراد کو بری کرتے ہوئے کہا تھا کہ مرکزی تفتیشی بیورو (سی بی آئی) کا مقدمہ عدالتی جانچ میں مکمل طور پر ناکام رہا اور بے بنیاد ثابت ہوا۔ سی بی آئی نے اس فیصلے کے خلاف ہائی کورٹ میں درخواست دائر کر رکھی ہے، جو تاحال زیر سماعت ہے۔