ممبئی: بمبئی ہائی کورٹ نے ممنوعہ تنظیم ’پاپولر فرنٹ آف انڈیا‘ (پی ایف آئی) کے ایک مبینہ رکن کو ضمانت دے دی۔ عدالت نے اس کے خلاف گواہوں کے بیانات کو ’’غیر اہم‘‘ قرار دیتے ہوئے کہا کہ صرف موبائل فون میں پیٹرول بم بنانے کا طریقہ سکھانے والی ویڈیو موجود ہونا کوئی جرم نہیں ہے۔

جسٹس سارنگ کوٹوال اور جسٹس رنجیت سنگھ راجا بھوسلے کی بنچ نے کہا کہ محمد اقبال ابراہیم خان کو ضمانت پر رہا کیا جانا چاہیے، کیونکہ اس مقدمے کی سماعت جلد مکمل ہونے کے امکانات نہیں ہیں۔ گزشتہ ہفتے جاری کیے گئے حکم میں عدالت نے کہا کہ استغاثہ ایسا کوئی ثبوت پیش کرنے میں ناکام رہا جس سے خان کا مبینہ جرائم میں ملوث ہونا ثابت ہو سکے۔

عدالت نے پولیس کے سامنے خان کے خلاف گواہوں کے دیے گئے بیانات کو ’’غیر اہم‘‘ قرار دیتے ہوئے کہا کہ ان سے زیادہ سے زیادہ یہ ثابت ہوتا ہے کہ ملزم پی ایف آئی کا رکن تھا، لیکن ان بیانات سے اس پر عائد کسی بھی جرم کی تصدیق نہیں ہوتی۔ خان کے موبائل فون میں پیٹرول بم بنانے کا طریقہ بتانے والی ویڈیو کی موجودگی کا ذکر کرتے ہوئے عدالت نے کہا کہ اس نے وہ ویڈیو کسی دوسرے شخص کو نہیں بھیجی تھی اور نہ ہی کسی کو اس تکنیک کا استعمال کرنے کے لیے اکسایا تھا۔

مہاراشٹر انسدادِ دہشت گردی اسکواڈ (اے ٹی ایس) نے خان کو ستمبر 2022 میں گرفتار کیا تھا اور وہ فی الحال عدالتی حراست میں ہے۔ اس کے خلاف تعزیراتِ ہند اور غیر قانونی سرگرمیاں (روک تھام) ایکٹ کی مختلف دفعات کے تحت مقدمہ درج کیا گیا تھا۔ استغاثہ کے مطابق خان پی ایف آئی کا ایک فعال رکن تھا، جس نے اس مقدمے کے دیگر ملزمان کے ساتھ مل کر حکومتِ ہند کے خلاف بغاوت کی سازش رچی تھی اور فروری سے جون 2022 کے درمیان شہر کے مختلف مقامات پر کئی اجلاس کیے تھے۔ تاہم، مقدمے کی سماعت کے بعد بنچ نے محمد اقبال ابراہیم خان کو ضمانت پر رہا کرنے کا حکم دیا۔