وارانسی (یوپی): وزیر اعظم نریندر مودی نے اتوار کو کہا کہ گزشتہ ساڑھے 11 سالوں میں حکومت نے ملک میں کھیلوں کے شعبے میں وسیع پیمانے پر تبدیلیاں کی ہیں اور 20 سے زیادہ بڑے بین الاقوامی ٹورنامنٹس کا انعقاد کیا ہے۔

انہوں نے کہا کہ بھارت ‘پورے عزم کے ساتھ’ 2036 کے اولمپکس کی میزبانی کی بھی تیاری کر رہا ہے۔ وارانسی میں آج سے شروع ہونے والی 72ویں سینئر نیشنل والی بال چیمپئن شپ کے افتتاحی پروگرام سے آن لائن خطاب کرتے ہوئے وزیر اعظم نے کہا کہ گزشتہ ایک دہائی میں کئی شہروں میں فیفا انڈر 17 ورلڈ کپ اور ہاکی ورلڈ کپ سمیت 20 سے زیادہ بڑے بین الاقوامی ٹورنامنٹس کا انعقاد کیا گیا۔

انہوں نے کہا، 2030 کے کامن ویلتھ گیمز بھی بھارت میں ہی منعقد ہونے جا رہے ہیں۔ بھارت پورے عزم کے ساتھ 2036 کے اولمپکس کی میزبانی کی تیاری کر رہا ہے۔ اس کے پیچھے مقصد یہ ہے کہ زیادہ سے زیادہ کھلاڑیوں کو کھیلنے کے زیادہ سے زیادہ مواقع ملیں۔ وزیر اعظم نے کہا کہ آج ملک ‘ریفارم ایکسپریس’ پر سوار ہے۔

ملک کے ہر شعبے اور ترقی کی ہر تعریف اس ‘ریفارم ایکسپریس’ سے جڑ رہی ہے اور کھیلوں کا شعبہ بھی اس میں شامل ہے۔ انہوں نے کہا، “کھیلوں کے شعبے میں بھی حکومت نے بڑے اور وسیع اصلاحات کی ہیں۔

نیشنل سپورٹس ایڈمنسٹریشن ایکٹ اور کھیلوں کے لیے بھارت پالیسی 2025… اس طرح کے اقدامات سے صحیح ٹیلنٹ کو مواقع ملیں گے، کھیلوں کے اداروں میں شفافیت بڑھے گی اور ساتھ ہی ملک کے نوجوانوں کو کھیل اور تعلیم دونوں شعبوں میں آگے بڑھنے کے مواقع ملیں گے۔

ایک طرح ہم مضبوط بنیادی ڈھانچہ اور مالی معاونت کا نظام تیار کر رہے ہیں اور ساتھ ہی نوجوانوں کو شاندار تجربات دینے کے لیے بھی کام کر رہے ہیں۔ مودی نے کہا کہ ایک وقت ایسا تھا جب کھیلوں کے حوالے سے حکومت اور معاشرہ دونوں میں بے حسی کا ماحول تھا۔ بہت کم نوجوان کھیل کو کیریئر کے طور پر اپناتے تھے، لیکن گزشتہ دہائی میں حکومت اور معاشرے دونوں کی سوچ میں تبدیلی آئی ہے۔

انہوں نے کہا، ہم اس لیے ترقی کر رہے ہیں کیونکہ ملک کے ہر شخص، ہر طبقہ ایک اجتماعی شعور اور ‘انڈیا فرسٹ’ کے جذبے کے ساتھ ملک کے لیے کام کر رہا ہے۔ صفائی سے لے کر ڈیجیٹل پیمنٹ تک، اور ‘ایک درخت ماں کے نام’ سے لے کر ‘ترقی یافتہ بھارت’ کے پروگرام تک، ہم اس لیے ترقی کر رہے ہیں کیونکہ ملک کے ہر شخص، ہر طبقہ ایک اجتماعی شعور اور انڈیا فرسٹ کے جذبے کے ساتھ ملک کے لیے کام کر رہا ہے۔