نئی دہلی/ آواز دی وائس

ملک میں کووڈ-19 کے فعال معاملات کی تعداد 4302 تک پہنچ گئی ہے۔ پچھلے 24 گھنٹوں میں کووڈ-19 کے 276 نئے کیسز درج کیے گئے ہیں۔ دہلی اور گجرات میں 64-64 نئے کیسز سامنے آئے ہیں، اتر پردیش میں 63 اور مغربی بنگال میں 60 نئے مریض پائے گئے ہیں۔ یہ تمام کیسز پچھلے 24 گھنٹوں میں درج کیے گئے ہیں۔ مہاراشٹر میں 16 اور راجستھان میں 15 نئے کیسز سامنے آئے ہیں۔

وہیں، گزشتہ 24 گھنٹوں میں 581 مریض صحت یاب ہوئے ہیں۔ اب تک 3281 کووڈ-19 کے مریض مکمل طور پر ٹھیک ہو چکے ہیں۔ پچھلے 24 گھنٹوں میں 7 لوگوں کی موت ہوئی ہے۔ دہلی میں 22 سالہ لڑکی کی کووڈ سے موت ہوئی ہے۔ مہاراشٹر میں 4 افراد کی موت ہوئی جن میں 55 سالہ مرد، 73 سالہ بزرگ، 23 سالہ لڑکی اور 27 سالہ نوجوان شامل ہیں۔

تمل ناڈو میں 76 سالہ بزرگ اور گجرات میں بھی ایک شخص کی موت ہوئی ہے۔ یکم جنوری 2025 سے اب تک ملک میں کووڈ-19 سے کل 44 افراد کی جان جا چکی ہے۔

کس ریاست میں کتنے فعال کیسز ہیں؟

مہاراشٹر میں موجودہ صورتحال

منگل کے روز مہاراشٹر میں کووڈ-19 سے متعلق مزید دو اموات درج کی گئیں، جس کے بعد ریاست میں جنوری سے اب تک اموات کی کل تعداد 14 ہو گئی ہے۔ صحت حکام کے مطابق، جاں بحق افراد میں سے ایک کو دائمی پھیپھڑوں کی بیماری (سی او پی ڈی )، برونکائٹس اور دل کی دھڑکن کی بے ترتیبی جیسی بیماریاں لاحق تھیں۔ اب تک کی گئی 14 اموات میں زیادہ تر مریضوں کو پہلے سے کوئی نہ کوئی بیماری لاحق تھی۔ فی الحال زیادہ تر فعال معاملات میں انفیکشن کی شدت کم بتائی جا رہی ہے۔

سال کی شروعات سے لے کر اب تک مہاراشٹر میں 12,880 کووڈ-19 ٹیسٹ کیے گئے، جن میں سے 959 نمونے مثبت پائے گئے۔ ان میں سے 435 مریض صحت یاب ہو چکے ہیں، جبکہ 3 جون تک ریاست میں 510 فعال کیسز موجود ہیں۔ صرف منگل کے دن 86 نئے کیسز رپورٹ ہوئے۔

ضلع وار تفصیلات

ممبئی: 26

تھانے: 9

نوی ممبئی: 6

کلیان-ڈومبیولی میونسپل کارپوریشن: 1

اُلہاس نگر: 1

ناسک: 4

پُنے: 3

پُنے میونسپل کارپوریشن: 24

پمپری-چنچواڑ میونسپل کارپوریشن: 3

کولہا پور میونسپل کارپوریشن: 2

سانگلی: 1

سانگلی میونسپل کارپوریشن: 4

ناگپور میونسپل کارپوریشن: 2

جنوری سے اب تک صرف ممبئی میں کووڈ-19 کے کل 509 کیسز سامنے آ چکے ہیں۔

ریاستی محکمہ صحت کا بیان

ریاستی محکمہ صحت نے کہا ہے کہ وہ صورتحال پر مسلسل نظر رکھے ہوئے ہیں اور ضرورت پڑنے پر تمام اضلاع میں نگرانی اور علاج کی سہولیات فوری طور پر بڑھا دی جائیں گی۔ شہریوں سے اپیل کی گئی ہے کہ وہ ہجوم سے بچیں، بخار یا کھانسی کی علامات ظاہر ہونے پر فوراً ڈاکٹر سے رجوع کریں اور کووڈ ٹیسٹ کروائیں۔

اگرچہ اس بار انفیکشن کی شدت کم بتائی جا رہی ہے، لیکن مئی میں اچانک کیسز میں اضافے اور اب تک ہوئی 14 اموات یہ ظاہر کرتی ہیں کہ کووڈ کا خطرہ مکمل طور پر ختم نہیں ہوا ہے۔