کولکاتا: مرکزی وزیر داخلہ امت شاہ نے بدھ کے روز دعویٰ کیا کہ مغربی بنگال اسمبلی انتخابات میں کانگریس ایک بھی نشست نہیں جیت سکے گی اور وزیر اعلیٰ ممتا بنرجی کا اس پارٹی سے اتحاد انہیں سیاسی طور پر مزید کمزور کرے گا۔ نئی بیرک پور کے قریب دم دم میں ایک انتخابی ریلی سے خطاب کرتے ہوئے امت شاہ نے یہ بھی کہا کہ کانگریس کئی ریاستوں میں بڑی شکست کی طرف بڑھ رہی ہے۔

انہوں نے کہا، “میں راہل گاندھی کو بتانا چاہتا ہوں کہ تمل ناڈو اور پڈوچیری میں کانگریس دہرے ہندسے تک بھی نہیں پہنچ سکے گی۔ مغربی بنگال میں تو آپ اپنا کھاتہ بھی نہیں کھول پائیں گے اور آسام میں کانگریس کو اب تک کی سب سے بڑی شکست کا سامنا کرنا پڑے گا۔” ممتا بنرجی پر تنقید کرتے ہوئے شاہ نے کہا، “ممتا دیدی، آپ اسی کانگریس کے ساتھ بیٹھے ہیں۔ آپ کی حالت بھی مزید خراب ہونے والی ہے۔

بھارتیہ جنتا پارٹی کے سینئر رہنما نے کانگریس صدر ملیکا ارجن کھرگے پر بھی تنقید کرتے ہوئے کہا کہ وہ راہل گاندھی کے ساتھ رہ کر سیاسی گفتگو کے معیار کو گرا رہے ہیں۔ انہوں نے کہا، “راہل گاندھی، آپ جتنا بھی وزیر اعظم نریندر مودی کو گالیاں دیں گے، اتنا ہی ‘کمل’ کھلے گا… راہل گاندھی کے ساتھ رہ کر کھرگے جی کی زبان بھی خراب ہونے لگی ہے۔

دراندازی کو انتخابی مہم کا اہم مسئلہ بناتے ہوئے شاہ نے ووٹروں سے اپیل کی کہ وہ صرف ایم ایل اے یا حکومت بنانے کے لیے نہیں بلکہ “مغربی بنگال کو دراندازوں سے پاک کرنے” کے لیے ووٹ دیں۔ انہوں نے کہا، “صرف ایم ایل اے منتخب کرنے یا حکومت بنانے کے لیے نہیں بلکہ دراندازوں سے پاک بنگال بنانے کے لیے ووٹ دیں۔” مغربی بنگال اسمبلی کی 294 نشستوں کے لیے انتخابات دو مرحلوں میں 23 اور 29 اپریل کو ہوں گے جبکہ ووٹوں کی گنتی 4 مئی کو ہوگی۔