ممبئی/ آواز دی وائس

مہاراشٹر کے اکولا ضلع کی ایک مسجد میں کانگریس کی مہاراشٹر اکائی کے نائب صدر ہدایتُ اللہ پٹیل پر چاقو سے حملہ کیا گیا تھا۔ پولیس کے مطابق حملے کے بعد زخمی رہنما بدھ کی صبح علاج کے دوران دم توڑ گئے۔

پولیس نے بتایا کہ مبینہ حملہ آور کو گرفتار کر لیا گیا ہے۔ پولیس کے مطابق منگل کی دوپہر تقریباً ڈیڑھ بجے اکوٹ تعلقہ کے موہالا گاؤں کی ایک مسجد میں ملزم نے پرانی رنجش کے سبب 66 سالہ ہدایتُ اللہ پٹیل پر تیز دھار ہتھیار سے حملہ کیا۔ اس حملے میں پٹیل کی گردن اور سینے پر شدید چوٹیں آئیں اور بہت زیادہ خون بہا۔ ایک پولیس افسر نے بتایا کہ انہیں اکوٹ کے ایک نجی اسپتال میں داخل کرایا گیا تھا، جہاں آئی سی یو میں علاج کے دوران بدھ کی صبح ان کا انتقال ہو گیا۔

اکولا: مسجد سے باہر نکلتے وقت ہدایت اللہ پٹیل پر حملہ

واقعے سے متعلق چند ویڈیوز سوشل میڈیا پر وائرل ہو رہی ہیں، جن میں پٹیل خون آلود کپڑوں میں نظر آ رہے ہیں۔ ہدایتُ اللہ پٹیل منگل کو موہالا کی جامع مسجد میں دوپہر کی نماز ادا کرنے گئے تھے۔ نماز کے بعد تقریباً 1:30 بجے جیسے ہی وہ مسجد سے باہر نکلے، حملہ آور نے تیز دھار ہتھیار سے ان پر حملہ کر دیا۔ پولیس کے مطابق مقامی لوگوں نے فوری طور پر پٹیل کو اسپتال پہنچایا۔ واقعے کے بعد پولیس موقع پر پہنچی اور فرانزک ماہرین کی مدد سے شواہد جمع کیے۔

ایڈیشنل سپرنٹنڈنٹ آف پولیس بی چندرکانت ریڈی نے بتایا کہ ملزم عبید خان کالو خان عرف رزق خان پٹیل (22) کو پکڑنے کے لیے پولیس کی چھ ٹیمیں تشکیل دی گئیں۔ اسے منگل کی رات تقریباً 8 بجے اکوٹ تعلقہ کے پنّاج گاؤں سے گرفتار کر لیا گیا۔ واقعے کے بعد موہالا اور اکوٹا شہر میں سکیورٹی سخت کر دی گئی ہے۔ ضلع کے پولیس سپرنٹنڈنٹ ارچت چندک صورتحال کا جائزہ لے رہے ہیں۔ ایک افسر نے بتایا کہ اکوٹ دیہی پولیس نے واقعے کے سلسلے میں مقدمہ درج کر لیا ہے اور مزید تفتیش جاری ہے۔