نئی دہلی: کانگریس کے تنظیمی جنرل سکریٹری کے سی وینوگوپال نے جمعہ کو مرکزی وزیر جتیندر سنگھ کے خلاف لوک سبھا میں استحقاق کی خلاف ورزی (بریچ آف پرولیج) کا نوٹس پیش کیا۔ ان کا الزام ہے کہ وزیر نے اپنے بیان کے ذریعے ایوان کو گمراہ کیا، جو استحقاق کی خلاف ورزی اور ایوان کی توہین کے زمرے میں آتا ہے۔

وینوگوپال نے لوک سبھا اسپیکر اوم برلا سے مطالبہ کیا کہ وہ جتیندر سنگھ کے خلاف استحقاق کی کارروائی شروع کریں۔ اسپیکر کو دیے گئے نوٹس میں وینوگوپال نے لوک سبھا کے قواعد و ضوابط کے قاعدہ 222 کے تحت استحقاق کا معاملہ اٹھایا ہے۔

نوٹس کے مطابق، جتیندر سنگھ نے 29 جولائی کو لوک امتحانات (غیر منصفانہ ذرائع کی روک تھام) ترمیمی بل، 2026 پر بحث کا جواب دیتے ہوئے کہا تھا کہ 20 جولائی کو دہلی میں طلبہ کے احتجاج کے دوران کوئی گولی نہیں چلائی گئی، صرف آنسو گیس کا استعمال ہوا، اس لیے گولی چلانے کا حکم دینے کا سوال ہی پیدا نہیں ہوتا۔

وینوگوپال نے دعویٰ کیا کہ وزیر کا یہ بیان زمینی حقائق کے منافی ہے۔ ان کے مطابق، متعلقہ واقعے میں گولی چلائی گئی تھی اور زخمی ہونے والے شخص کا اب بھی علاج جاری ہے۔ کانگریس رہنما نے الزام لگایا کہ جتیندر سنگھ نے جان بوجھ کر غلط معلومات پیش کیں اور ایوان کو گمراہ کیا۔ انہوں نے کہا کہ کسی وزیر کی جانب سے ایوان کو گمراہ کرنا استحقاق کی خلاف ورزی تصور کیا جاتا ہے، اور وزیر کی ذمہ داری ہے کہ وہ ایوان میں کوئی بھی بات رکھنے سے پہلے اس کی مکمل تصدیق کرے۔ وینوگوپال نے اسپیکر سے درخواست کی ہے کہ اس معاملے میں استحقاق کی کارروائی شروع کی جائے اور مزید جانچ و ضروری کارروائی کے لیے اسے استحقاق کمیٹی کے سپرد کیا جائے۔