سری نگر

جموں و کشمیر میں کانگریس یونٹ نے پیر کے روز بی جے پی کی قیادت والی مرکزی حکومت کے خلاف احتجاج کیا اور امریکہ کے ساتھ تجارتی معاہدے کے معاملے پر وزیر اعظم نریندر مودی کے استعفے کا مطالبہ کیا۔پارٹی نے جموں و کشمیر کو دوبارہ ریاست کا درجہ دینے کا بھی مطالبہ کیا۔

سری نگر میں کانگریس کے درجنوں کارکن اور رہنما ایم اے روڈ پر واقع جموں و کشمیر پردیش کانگریس کمیٹی کے دفتر کے باہر جمع ہوئے اور مودی حکومت کے خلاف نعرے بازی کی۔

مظاہرین، جن کی قیادت رکن اسمبلی بانڈی پورہ نظام الدین بھٹ کر رہے تھے، پارٹی دفتر سے ایم اے روڈ تک مارچ کر کے احتجاج کرنے کا منصوبہ بنا رہے تھے۔ تاہم پولیس کی بڑی تعداد نے مظاہرین کو روک دیا اور پارٹی دفتر کا دروازہ بند کر دیا، جس کے باعث وہ باہر مارچ نہیں کر سکے۔صحافیوں سے بات کرتے ہوئے بھٹ نے کہا کہ حکومت نے ملک کی شبیہ اور خودمختاری پر “سمجھوتہ” کیا ہے۔

انہوں نے کہا كہ اس تجارتی معاہدے کا سیدھا نتیجہ یہ ہے کہ پہلی بار ہندوستان کی خودمختاری اور اس کی عالمی شبیہ کو نقصان پہنچا ہے۔ اس کے دور رس اثرات ہوں گے۔بھٹ نے کہا کہ ہند۔امریکہ تجارتی معاہدے کے معاشی اثرات بھی پڑیں گے۔

انہوں نے کہا كہ ملک کی اقتصادی صورتحال بہت خراب ہے، ہم کسی حد تک کساد بازاری کا سامنا کر رہے ہیں۔ اس معاہدے کے ذریعے ہم صرف عام آدمی کو نہیں بلکہ ملک کی معاشی بنیاد کو بھی نقصان پہنچا رہے ہیں۔بھٹ نے مزید کہا کہ حکومت کو نہ آئین کی فکر ہے، نہ ملک کی خودمختاری کی، نہ دیگر ممالک کے ساتھ تعلقات کی پالیسیوں کی، نہ غریبوں کی اور نہ ہی جموں و کشمیر کی شناخت کی۔

انہوں نے کہا كہ ہم نے اپنی سالمیت، ریاست کی سلامتی اور ایک مضبوط مقابلہ کرنے والے ملک کی حیثیت کو نقصان پہنچایا ہے۔ ایک لفظ میں یہ پالیسی نہایت سنگین رویہ ہے جو اس ملک کے لیے اچھا ثابت نہیں ہوگا۔بھٹ نے یہ بھی کہا کہ ملک کو ایران کی حمایت میں اور امریکہ و اسرائیل کی “بربریت” کے خلاف کھڑا ہونا چاہیے تھا۔

جموں میں بھی کانگریس کے درجنوں کارکن اور رہنما رہائشی روڈ کے قریب شہیدی چوک میں واقع پارٹی ہیڈکوارٹر کے باہر جمع ہوئے، لیکن پولیس نے امن و امان برقرار رکھنے کے لیے بڑی تعداد میں تعینات ہو کر انہیں آگے بڑھنے سے روک دیا۔

کارکنان، جن میں خواتین بھی شامل تھیں، پلے کارڈ اٹھائے ہوئے تھے جن پر “ریاستی درجہ بحال کرو” اور “ہماری ریاست ہمارا حق” جیسے نعرے درج تھے۔ انہوں نے مودی حکومت اور ہند۔امریکہ تجارتی معاہدے کے خلاف بھی نعرے بازی کی۔مرکز پر سخت تنقید کرتے ہوئے پردیش کانگریس کمیٹی کے صدر طارق احمد کرا نے الزام لگایا کہ وزیر اعظم نے “ہندوستان کی عالمی ساکھ کو تباہ کر دیا ہے” اور ان اداروں کو کمزور کر دیا ہے جو کبھی ملک کی خارجہ پالیسی کی پہچان تھے۔

انہوں نے کہا كہ ہندوستان عدم وابستہ تحریک اور سارک جیسے علاقائی تعاون کے پلیٹ فارمز کا علمبردار تھا، لیکن آج ملک کی شبیہ کو نقصان پہنچا ہے۔ وزیر اعظم کے طرز عمل نے اس عہدے کے وقار اور عزت کو کم کر دیا ہے۔انہوں نے الزام لگایا کہ حکومت عالمی طاقتوں کے ساتھ معاملات میں ہندوستان کے مفادات پر سمجھوتہ کر رہی ہے۔

انہوں نے کہا كہ وہ یہ تک طے کر رہے ہیں کہ ہندوستان کو روس سے تیل خریدنا چاہیے یا نہیں۔ ہماری تجارت اور توانائی کی سلامتی سے متعلق ایسے فیصلے دوسرے ممالک کے کہنے پر نہیں ہونے چاہئیں۔کانگریس رہنما نے وزیر اعظم پر بین الاقوامی معاملات میں “مکمل ہتھیار ڈالنے” کا الزام لگاتے ہوئے دوبارہ مطالبہ کیا کہ مودی کو استعفیٰ دے دینا چاہیے۔

انہوں نے الزام لگایا كہ امریکہ اور اسرائیل کے پاس مودی کی ویڈیوز ہیں اور وہ انہیں بلیک میل کر رہے ہیں۔ وہ دباؤ میں ہیں اور انہیں استعفیٰ دینا چاہیے۔احتجاج کے دوران مظاہرین نے بطور احتجاج امریکہ اور اسرائیل کے جھنڈے بھی نذر آتش کیے۔کرا نے کہا کہ پارٹی نے پارلیمنٹ کے جاری بجٹ اجلاس کے دوران جموں و کشمیر کے تمام 20 اضلاع میں احتجاج کا منصوبہ بنایا تھا، لیکن ان کا الزام ہے کہ کشمیر وادی کے بعض اضلاع میں پولیس نے پُرامن مظاہروں کی اجازت نہیں دی۔انہوں نے دعویٰ کیا کہ وادی کے کئی اضلاع میں کانگریس کارکنوں کو یا تو حراست میں لیا گیا یا گھروں میں نظر بند کر دیا گیا، جسے انہوں نے جمہوری حقوق کی پامالی قرار دیا۔

انہوں نے کہا كہ ہمیں احتجاج کا آئینی حق استعمال کرنے کی اجازت نہیں دی جا رہی۔ یہ جمہوریت نہیں بلکہ آمریت ہے اور نازی دور کی نقل ہے۔کرا نے جموں و کشمیر کو دوبارہ ریاستی درجہ دینے کے مطالبے کو دہرایا۔

انہوں نے کہا كہ ریاستی درجہ کی بحالی ہمارا واضح مؤقف ہے اور ہم اسے دہرا رہے ہیں۔ ہم کسی سے بھیک نہیں مانگ رہے اور نہ ہی کوئی احسان چاہتے ہیں۔ ہمیں اپنی آئینی ضمانتیں واپس چاہیے۔انہوں نے زور دے کر کہا کہ جب تک ریاستی درجہ بحال نہیں کیا جاتا پارٹی اپنی جدوجہد جاری رکھے گی۔

کانگریس رہنما نے ایل پی جی سمیت بڑھتی ہوئی قیمتوں پر بھی مرکز کو تنقید کا نشانہ بنایا اور کہا کہ ان اضافوں سے کروڑوں لوگوں پر مزید بوجھ پڑے گا اور ملک کی اقتصادی صورتحال مزید خراب ہوگی۔