نئی دہلی: سپرِیم کورٹ نے اراولی پہاڑی سلسلے میں غیر قانونی کان کنی کے مسئلے پر شدید تشویش ظاہر کرتے ہوئے کہا ہے کہ اس سے ماحول کو ناقابلِ تلافی نقصان پہنچ سکتا ہے۔ اس معاملے میں سخت موقف اختیار کرتے ہوئے عدالت نے اراولی علاقے میں کان کنی اور اس سے متعلق تمام پہلوؤں کی جامع جانچ کے لیے ایک ماہرین کی کمیٹی تشکیل دینے کا فیصلہ کیا ہے۔

چیف جسٹس سُوریا کانت اور جسٹس جویمالیا باگچی اور جسٹس وِپُل ایم پَنچولی کی بنچ نے کہا کہ اراولی جیسے حساس علاقے میں غیر قانونی کان کنی نہ صرف ماحول کے لیے بلکہ آئندہ نسلوں کے لیے بھی سنگین خطرہ ہے۔ عدالت نے اضافی سولیسیٹر جنرل ایشوریا بھٹی اور ایمِکس کیوری کے پرمیشور کو ہدایت دی کہ وہ چار ہفتوں کے اندر کان کنی کے معاملات میں ماہر ماحولیاتی سائنسدانوں اور محققین کے نام تجویز کریں تاکہ ایک اعلیٰ سطح کی ماہرین کمیٹی تشکیل دی جا سکے۔

یہ کمیٹی سپرِیم کورٹ کی نگرانی اور رہنمائی میں کام کرے گی۔ سماعت کے دوران عدالت کو بتایا گیا کہ اراولی کے مختلف حصوں میں غیر قانونی کان کنی کی سرگرمیاں جاری ہیں۔ اس پر راجستھان حکومت کی جانب سے پیش اضافی سولیسیٹر جنرل کے ایم نٹرراج نے عدالت کو یقین دلایا کہ ریاست میں کسی بھی طرح کی غیر قانونی کان کنی نہیں ہونے دی جائے گی۔

سپرِیم کورٹ نے اراولی پہاڑی سلسلے اور اس کی درجہ بندی سے متعلق 20 نومبر کے اپنے حکم کو فی الحال موخر رکھنے کا فیصلہ بھی برقرار رکھا ہے۔ عدالت نے کہا تھا کہ نئی تعریف میں کچھ سنگین ابہام ہیں جنہیں حل کرنا ضروری ہے۔ واضح رہے کہ سپرِیم کورٹ نے 20 نومبر کو دہلی، ہریانہ، راجستھان اور گجرات میں پھیلے اراولی پہاڑی سلسلے میں نئی کان کنی کی لیز جاری کرنے پر پابندی عائد کی تھی۔ یہ پابندی ماہرین کی رپورٹ آنے تک برقرار رکھی گئی۔

یہ فیصلہ وزارت ماحولیات، جنگلات اور موسمیاتی تبدیلی کی کمیٹی کی سفارشات کی بنیاد پر کیا گیا تھا، جس کا مقصد دنیا کے قدیم ترین پہاڑی سلسلوں میں سے ایک اراولی کا تحفظ ہے۔ اب سپرِیم کورٹ کی طرف سے تشکیل دی جانے والی ماہرین کمیٹی کی رپورٹ کی بنیاد پر اراولی علاقے میں کان کنی اور تحفظ سے متعلق آئندہ فیصلے کیے جائیں گے۔