نئی دہلی: کاکروچ جنتا پارٹی (کاجپا) کے کارکنوں اور حامیوں نے پیر کے روز پارلیمنٹ مارچ کے دوران شدید پولیس بندوبست، لاٹھی چارج اور آنسو گیس کے گولے داغے جانے کے باوجود احتجاج جاری رکھا اور مرکزی وزیر تعلیم دھرمیندر پردھان کے استعفے کا مطالبہ کیا۔

اس مارچ میں دہلی بھر سے طلبہ اور عام شہریوں نے شرکت کی۔ پارلیمنٹ مارگ کے قریب پولیس نے متعدد مقامات پر بیریکیڈ لگا کر مارچ کو روک دیا۔ کئی مظاہرین کا کہنا تھا کہ انہیں پہلے ہی مزاحمت کا اندازہ تھا، لیکن وہ اپنے احتجاج کو ہر صورت جاری رکھنے کے عزم کے ساتھ آئے تھے۔

دہلی یونیورسٹی کی طالبہ گلوری نے کہا، "پولیس نے ہمیں کئی بار روکنے کی کوشش کی۔ پورے راستے میں بڑے پیمانے پر بیریکیڈنگ کی گئی۔ ہمیں لاٹھی چارج اور آنسو گیس کا بھی سامنا کرنا پڑا، لیکن ہم پیچھے نہیں ہٹیں گے۔" متعدد طلبہ نے احتجاج کے حوالے سے حکومت کے رویے پر مایوسی ظاہر کرتے ہوئے کہا کہ کئی ہفتوں سے جاری مظاہروں کے باوجود ان کے مطالبات پر کوئی توجہ نہیں دی گئی۔ ایک طالب علم مظاہرہ کرنے والے نے کہا، "جو ملک اپنے طلبہ کی پروا نہیں کرتا، اس کا زوال یقینی ہے۔"