نئی دہلی: بھارتی کوسٹ گارڈ نے جمعرات کو سپریم کورٹ کو بتایا کہ وہ قلیل مدتی سروس کے تحت مقرر افسر پرینکا تیاگی اور اسی نوعیت کی دیگر خاتون افسران کو مستقل کمیشن دینے پر ان کی ویجیلنس کلیئرنس رپورٹ موصول ہونے کے بعد غور کرے گا۔ مستقل کمیشن (پی سی) کا مطلب مسلح افواج میں ریٹائرمنٹ تک ملازمت کا موقع ہے، جبکہ قلیل مدتی سروس کمیشن (ایس ایس سی) میں ملازمت کی مدت 10 سے 14 سال تک مقرر ہوتی ہے۔

سپریم کورٹ اس سے قبل اپنے مختلف فیصلوں میں فوج، فضائیہ اور بحریہ میں خدمات انجام دینے والی خاتون ایس ایس سی افسران کو مستقل کمیشن دینے کی اجازت دے چکی ہے۔ عدالت عظمیٰ نے 19 اگست کو ایک خاتون افسر کو مستقل کمیشن نہ دیے جانے پر بھارتی کوسٹ گارڈ پر سخت ناراضی ظاہر کرتے ہوئے کہا تھا، "ہم خاتون افسران کی توہین نہیں ہونے دیں گے۔"

بھارتی کوسٹ گارڈ اور مرکزی حکومت کی جانب سے پیش ہوئے اٹارنی جنرل آر. وینکٹ رمنی نے جمعرات کو جسٹس سوریہ کانت، جسٹس جوی مالیا باگچی اور جسٹس وی. موہنا کی بنچ کو بتایا کہ پرینکا تیاگی اور مستقل کمیشن کی خواہش رکھنے والی دیگر خاتون افسران کی اہلیت کی جانچ اور ویجیلنس کلیئرنس مکمل ہونے کے بعد کوسٹ گارڈ انہیں مستقل کمیشن دینے پر غور کرے گا۔