نئی دہلی/ آواز دی وائس

ملک کے چیف جسٹس بی آر گوائی کو انفیکشن کے باعث دہلی کے ایک اسپتال میں داخل کیا گیا ہے۔  انہیں طبی علاج فراہم کیا جا رہا ہے اور ان کی طبیعت میں تیزی سے بہتری آ رہی ہے۔ انفیکشن سے متعلق تفصیلی معلومات شیئر نہیں کی گئی ہیں، لیکن ذرائع نے بتایا ہے کہ چیف جسٹس کی حالت بہتر ہو رہی ہے اور امید ہے کہ وہ ایک یا دو دن میں اسپتال سے فارغ ہو کر دوبارہ اپنی ذمہ داریاں سنبھال لیں گے۔ اس سے قبل 12 جولائی کو جسٹس گوئی نے حیدرآباد کی نالسا یونیورسٹی آف لاء کے کانووکیشن تقریب میں بطور مہمان خصوصی شرکت کی تھی۔

حیدرآباد میں ایک خصوصی پروگرام میں لی تھی شرکت

۔12 جولائی کو، جسٹس گوائی  حیدرآباد میں نالسا یونیورسٹی آف لاء کے دیکشانت سماروہ (کانووکیشن) میں بطور مرکزی مقرر شریک ہوئے تھے۔ اسی دن انہوں نے ایک خصوصی ڈاک ٹکٹ کور بھی جاری کیا، جس کا عنوان تھا: "بابا صاحب ڈاکٹر بی آر امبیڈکر – دستور ساز اسمبلی – ہندوستان کا آئین"۔ اس کے ساتھ ہی انہوں نے "ہندوستان کے آئین میں فن اور خطاطی" پر مبنی آرٹ پوسٹ کارڈز کا بھی اجراء کیا تھا۔

خصوصی ڈاک کور میں امبیڈکر کے کردار کی جھلک

سرکاری پریس ریلیز کے مطابق، تلنگانہ کے چیف پوسٹ ماسٹر جنرل پی وی ایس ریڈی نے یہ خصوصی ڈاک کور جسٹس گوئی کو پیش کیا۔ اس موقع پر سپریم کورٹ کے جسٹس پی ایس نرسمہا، تلنگانہ ہائی کورٹ کے قائم مقام چیف جسٹس سُجَے پال اور ریاست کے ایڈووکیٹ جنرل اے. سدھرشَن ریڈی بھی موجود تھے۔ یہ خصوصی کور اور معلوماتی پمفلٹ ڈاکٹر امبیڈکر کی زندگی، آئین سازی میں ان کے کردار، اور مرکزی حکومت کی جانب سے جاری کیے گئے ڈاک ٹکٹوں و سکوں کی جھلک پیش کرتا ہے۔

جسٹس بی آر گوائی کون ہیں؟

جسٹس بی آر گوائی  نے 14 مئی 2025 کو ہندوستان کے چیف جسٹس کے طور پر حلف لیا تھا۔ وہ اس عہدے تک پہنچنے والے دوسرے دلت جج ہیں۔ ان سے پہلے جسٹس کے جی بال کرشنن 2007 میں اس عہدے پر فائز ہوئے تھے۔ گوئی مہاراشٹر کے ضلع امراؤتی سے تعلق رکھتے ہیں اور ان کی مدت کار 14 مئی 2025 سے 24 نومبر 2025 تک رہے گی، جب وہ ریٹائر ہوں گے۔ ان کے والد، جسٹس رام کرشن سوریہ بھان گوئی، ریپبلکن پارٹی آف انڈیا  کے بانی تھے۔ وہ مہاراشٹر کی سیاست میں سرگرم رہے اور 1998 میں امراؤتی سے لوک سبھا کے رکن منتخب ہوئے تھے۔