نئی دہلی/ آواز دی وائس

دہلی میں بارش سے پیدا ہونے والے حالات پر چیف جسٹس آف انڈیا  بی آر گوئی نے ایک مقدمے کی سماعت کے دوران کہا كہ دہلی میں آپ جانتے ہیں کہ کیا ہوتا ہے۔ اگر دو گھنٹے بارش ہو جائے تو پورا شہر مفلوج ہو جاتا ہے  انہوں نے ٹریفک جام کے مسئلے کو بھی سنگین بتایا۔ سپریم کورٹ نے کیرالہ کی ایک ہائی وے پر 12 گھنٹے تک لگے ٹریفک جام پر بھی سوال اٹھایا۔ عدالت نے کہا کہ اگر کسی شخص کو سڑک کے ایک کنارے سے دوسرے کنارے تک پہنچنے میں 12 گھنٹے لگتے ہیں، تو وہ ٹول کیوں ادا کرے؟ سے جے آئیگوئی نے یہ تبصرہ کیرالہ کے ضلع تِرشور میں  این ایچ 544 کے ایک ٹول پلازہ کے معاملے کی سماعت کے دوران کیا۔ دراصل ہائی کورٹ نے ہائی وے کی خراب حالت کے باعث ٹول وصولی کو معطل کر دیا تھا۔ کیرالہ ہائی کورٹ کے اس فیصلے کو این ایچ اے آئی نے سپریم کورٹ میں چیلنج کیا ہے۔

سپریم کورٹ نے این ایچ اے آئی کی عرضداشت پر فیصلہ محفوظ رکھ لیا ہے۔ پیر کو سماعت کے دوران ہندوستان کے چیف جسٹس بی آر گَوئی، جسٹس کے ونود چندرن اور جسٹس این وی انجاریا کی بینچ نے گزشتہ ہفتے اس ہائی وے پر 12 گھنٹے سے زیادہ وقت تک لگے بھاری ٹریفک جام کا بار بار ذکر کیا۔ جسٹس چندرن نے این ایچ اے آئی سے کہا: “آپ نے کل کا اخبار دیکھا؟ — 12 گھنٹے تک ٹریفک جام رہا۔” سالیسٹر جنرل تُشار مہتا نے کہا کہ یہ “ایکٹ آف گاڈ” تھا، ایک لاری گر گئی تھی۔ جسٹس چندرن نے کہا: “لاری اپنے آپ نہیں گری، وہ ایک گڑھے میں گر کر الٹ گئی۔” ایس جی نے کہا کہ این ایچ اے آئی نے ان جگہوں پر متبادل راستے کے طور پر سروس روڈ بنایا ہے جہاں انڈر پاس کی تعمیر چل رہی ہے؛ تاہم، مانسون کی وجہ سے تعمیراتی کام متاثر ہوا۔ اس موقع پر چیف جسٹس گَوئی نے پوچھا کہ 65 کلومیٹر کے اس حصے کے لیے ٹول کی قیمت کتنی ہے؟

یہ بتایا جانے پر کہ یہ 150 روپے ہے، چیف جسٹس نے پوچھا: اگر کسی شخص کو سڑک کے ایک سرے سے دوسرے سرے تک پہنچنے میں 12 گھنٹے لگتے ہیں تو اسے 150 روپے کیوں دینا چاہیے؟ جس سڑک پر ایک گھنٹے میں پہنچنے کی امید ہے، وہاں 11 گھنٹے مزید لگتے ہیں اور اوپر سے ٹول بھی دینا پڑتا ہے۔ اس پر سالیسٹر جنرل نے وضاحت دی کہ ایک فیصلے میں کہا گیا ہے کہ ایسے معاملے میں ٹول نہ لگانے کے بجائے متناسب طور پر ٹول میں کمی ہونی چاہیے۔ جسٹس چندرن نے ہلکے پھلکے انداز میں کہا: 12 گھنٹے کے جام کے لیے تو نیشنل ہائی وے کو مسافروں کو کچھ پیسہ دینا چاہیے۔ اگر ٹریفک نہ ہو تو یہ حصہ ایک گھنٹے میں طے ہو سکتا ہے۔ اگر ٹریفک ہو تو زیادہ سے زیادہ تین گھنٹے لگ سکتے ہیں۔ لیکن 12 گھنٹے کے لیے متناسب کٹوتی کا کوئی سوال ہی نہیں ہے۔

ایس جی تُشار مہتا نے عدالت کے سامنے سڑک کا ایک ویڈیو بھی پیش کیا۔ سے جے آئیگوئی نے کہا کہ ساحلی علاقوں میں مانسون کے دوران حالات اور بھی خراب ہو جاتے ہیں۔ معاملے میں پیش وکیل نے سپریم کورٹ کے ای گیٹ کا حوالہ دیتے ہوئے کہا کہ وہاں ہمیشہ ٹریفک رہتا ہے اور وکیلوں کو عدالت پہنچنے میں ایک گھنٹہ لگ جاتا ہے۔ اس پر سے جے آئیگوئی نے کہا كہ دہلی کی تو جانتے ہیں۔ اگر دو گھنٹے بارش ہو جائے تو پورا شہر مفلوج ہو جاتا ہے۔” تاہم، سپریم کورٹ نے کیرالہ کے معاملے میں فیصلہ محفوظ رکھا۔ 14 اگست کو سپریم کورٹ نے کیرالہ کے تِرشور ضلع کے پالیئککارا ٹول پلازہ پر ٹول وصولی معطل کرنے کے کیرالہ ہائی کورٹ کے حکم میں مداخلت کرنے کے تئیں عدم دلچسپی ظاہر کی تھی۔

چیف جسٹس بی آر گَوئی اور جسٹس کے ونود چندرن کی بینچ نے ہندوستانی نیشنل ہائی وے اتھارٹی  کی عرضداشت پر سماعت کرتے ہوئے کیرالہ میں نیشنل ہائی وے 544 کے ایڈاپلّی-منّوٹی حصے کی خراب حالت کا حوالہ دیا۔ بینچ نے کہا كہ آپ لوگوں سے ٹول لیتے ہیں لیکن سہولتیں فراہم نہیں کرتے، سروس روڈ کی دیکھ بھال نہیں کی جاتی۔ جسٹس چندرن نے این ایچ اے آئی سے کہا تھا کہ اپیل دائر کرنے اور وقت ضائع کرنے کے بجائے کچھ عملی قدم اٹھائیں۔ انہوں نے کہا کہ بھیڑ بھاڑ کے دوران ایمبولینس کو بھی گزرنے میں دقت ہوتی ہے۔ کیرالہ ہائی کورٹ نے 6 اگست کو ٹول وصولی کو چار ہفتے کے لیے معطل کرنے کا حکم دیا تھا۔

سپریم کورٹ میں این ایچ اے آئی کی جانب سے پیش ہوئے سالیسٹر جنرل تُشار مہتا نے دلیل دی کہ ہائی کورٹ کے فیصلے نے غلط طریقے سے ٹھیکیدار کمپنی کو این ایچ اے آئی سے نقصان کی وصولی کرنے کی اجازت دے دی۔ انہوں نے کہا کہ آپریشن اور مینٹیننس معاہدے کے تحت دیکھ بھال کی ذمہ داری ٹھیکیدار کی ہوتی ہے۔