نئی دہلی: ہندوستان کے چیف جسٹس (سی جے آئی) سوریہ کانت نے جمعہ کے روز سپریم کورٹ کے سبکدوش ہونے والے جج صاحبان، جسٹس جے کے ماہیشوری اور جسٹس پنکج متّل کی انکساری اور عدالتی بصیرت کی ستائش کی۔ دونوں جج سپریم کورٹ میں جزوی عدالتی تعطیلات (یکم جون سے 12 جولائی) کے دوران سبکدوش ہوں گے۔ جسٹس ماہیشوری 28 جون جبکہ جسٹس پنکج متّل 16 جون کو ریٹائر ہوں گے۔

چیف جسٹس سوریہ کانت نے دونوں ججوں کے اعزاز میں منعقدہ رسمی فل کورٹ تقریب سے خطاب کرتے ہوئے کہا: “جسٹس ماہیشوری نے ہمیشہ نہایت انکساری کے ساتھ کام کیا ہے۔ میں متّل بھائی کا وقار، دیانت داری، تحمل اور اعتماد کے ساتھ برسوں تک مخلصانہ خدمات انجام دینے پر شکریہ ادا کرتا ہوں۔”

انہوں نے کہا: “جسٹس متّل کی خدمات صرف فیصلے سنانے تک محدود نہیں رہیں۔ان کی شائستگی اور نیک نیتی نے بہت سے لوگوں کی زندگیوں پر اثر ڈالا۔ وہ بنچ میں غیر معمولی عدالتی فہم لے کر آئے۔ بظاہر عام نوعیت کے مقدمات پر بھی انہوں نے نہایت احتیاط اور سنجیدگی سے غور کیا۔” اس موقع پر اٹارنی جنرل آر وینکٹ رمنی، سالیسٹر جنرل تشار مہتا، ایڈیشنل سالیسٹر جنرل ایشوریہ بھاٹی، سینئر وکیل مکل روہتگی، سپریم کورٹ ایڈووکیٹس آن ریکارڈ ایسوسی ایشن (SCAORA) کے صدر دیوورت اور دیگر شخصیات نے بھی اپنے خیالات پیش کیے۔

جسٹس جے کے ماہیشوری 29 جون 1961 کو مدھیہ پردیش کے ضلع مرینا میں پیدا ہوئے تھے۔ انہیں 25 نومبر 2005 کو مدھیہ پردیش ہائی کورٹ کا ایڈیشنل جج مقرر کیا گیا تھا، جبکہ 25 نومبر 2008 کو وہ مستقل جج بنے۔ بعد میں ان کا تبادلہ آندھرا پردیش ہائی کورٹ کے چیف جسٹس کے طور پر کیا گیا، جہاں انہوں نے 7 اکتوبر 2019 کو عہدہ سنبھالا۔

اس کے بعد انہیں سکّم ہائی کورٹ کا چیف جسٹس مقرر کیا گیا اور انہوں نے 6 جنوری 2021 کو اس عہدے کا چارج لیا۔ 31 اگست 2021 کو انہوں نے سپریم کورٹ کے جج کے طور پر حلف لیا۔ جسٹس پنکج متّل 17 جون 1961 کو میرٹھ میں پیدا ہوئے تھے۔ انہیں 7 جولائی 2006 کو الٰہ آباد ہائی کورٹ کا ایڈیشنل جج مقرر کیا گیا تھا۔