نئی دہلی: احمد آباد میں پیش آئے ایئر انڈیا طیارہ حادثے کے بعد، آزاد سماج پارٹی کے صدر اور نگینہ (اتر پردیش) سے رکنِ پارلیمان چندرشیکھر آزاد نے اپنا ایک ذاتی تجربہ شیئر کیا ہے اور شہری ہوابازی کے مرکزی وزیر کو ایک خط لکھ کر طیاروں کی حفاظت کے سلسلے میں فوری اقدامات کا مطالبہ کیا ہے۔ چندرشیکھر آزاد نے اپنی 6 جون کی دبئی سفر کا حوالہ دیتے ہوئے بتایا کہ وہ صبح 7:20 بجے ایئر انڈیا کی پرواز سے روانہ ہو رہے تھے، مگر پرواز میں تکنیکی خرابی کے باعث اُسے دو گھنٹے تاخیر کا سامنا کرنا پڑا۔ بعد میں تین گھنٹے بعد، جب مسئلہ حل نہ ہو سکا، تو مسافروں کو دوسرے طیارے سے روانہ کیا گیا۔

چندرشیکھر آزاد نے بتایا کہ اُس روز ان کی سیٹ نمبر 11 تھی۔ یہی سیٹ احمد آباد سے لندن جانے والی حادثہ زدہ فلائٹ AI171 میں اُس واحد شخص کی تھی جو حادثے میں زندہ بچا۔ چنانچہ آزادنے اندیشہ ظاہر کیا کہ اگر یہ حادثہ 6 جون کو پیش آتا تو شاید وہ بھی آج زندہ نہ ہوتے۔ چندرشیکھر آزاد نے شہری ہوابازی کے مرکزی وزیر کو ایک خط میں مطالبہ کیا کہ ملک بھر میں تمام ایئرکرافٹس کی مکمل جانچ کی جائے۔

انہوں نے الزام لگایا کہ ایئر انڈیا کے طیاروں میں بار بار خرابی کی خبریں آ رہی ہیں اور یہ مسافروں کی جانوں سے کھیلنے کے مترادف ہے۔ انہوں نے سوال اٹھایا کہ جو لوگ اس حادثے میں جاں بحق ہوئے، ان کے خاندانوں کا کیا ہوگا؟ عوام میں خوف اور غصے کا ماحول ہے، اور ایئر انڈیا کو جوابدہ بنایا جانا چاہیے۔ چندرشیکھر نے زور دیا کہ ذمہ داروں کے خلاف فوری کارروائی کی جائے۔

ایئر انڈیا کی پرواز اے171، جو احمد آباد سے لندن گیٹوک جا رہی تھی، روانگی کے کچھ ہی دیر بعد میگھانی نگر کے علاقے میں گر کر تباہ ہو گئی۔ حادثے میں اب تک 265 افراد جاں بحق ہو چکے ہیں، جن میں 241 مسافر اور عملہ شامل تھا۔ صرف ایک شخص، وشواس کمار رمیش ہی زندہ بچ سکے، جن کی سیٹ بھی 11اے تھی۔ یہ اتفاق حیرت انگیز ہے کہ چندرشیکھر آزاد بھی 6 جون کو اسی سیٹ پر بیٹھے تھے۔