نئی دہلی : مرکزی حکومت نے بدھ کے روز دہلی ہائی کورٹ کو بتایا کہ سوالیہ پرچوں میں کچھ خامیوں کی شکایات کے بعد یو جی سی نیٹ جون 2026 کے تین مضامین، جن میں سماجیات بھی شامل ہے، کے امتحانات دوبارہ منعقد کیے جائیں گے۔ مرکزی حکومت کی جانب سے پیش ہوئے سالیسٹر جنرل (ایس جی) تشار مہتا کے دلائل کو مدنظر رکھتے ہوئے جسٹس جس میت سنگھ نے ایک امیدوار کی جانب سے دائر درخواست کا نمٹا دیا۔

درخواست میں سوالیہ پرچہ لیک ہونے کے الزامات کی آزادانہ تحقیقات اور دوبارہ امتحان منعقد ہونے تک نتائج کے اعلان پر روک لگانے کی اپیل کی گئی تھی۔ سالیسٹر جنرل نے ہائی کورٹ کو بتایا کہ انگریزی اور کامرس کے امتحانات 9 ستمبر کو، جبکہ سماجیات کا امتحان 10 ستمبر کو منعقد کیا جائے گا۔ انہوں نے کہا کہ چونکہ حکام نے امتحان دوبارہ کرانے کا فیصلہ کر لیا ہے، اس لیے درخواست میں اب کچھ باقی نہیں رہ گیا ہے۔

جسٹس سنگھ نے سرکاری وکیل کے بیان کو ریکارڈ پر لیتے ہوئے کہا، ’’سالیسٹر جنرل کے بیان کو دیکھتے ہوئے درخواست میں کی گئی استدعا اب مؤثر نہیں رہ گئی ہے، لہٰذا درخواست کا نمٹا کیا جاتا ہے۔‘‘ نیشنل ٹیسٹنگ ایجنسی (این ٹی اے) نے جون 2026 کا یو جی سی نیٹ امتحان 22 سے 30 جون تک 87 مضامین میں منعقد کیا تھا۔ یہ امتحان جونیئر ریسرچ فیلوشپ (جے آر ایف)، اسسٹنٹ پروفیسر کے عہدے کے لیے اہلیت اور پی ایچ ڈی پروگراموں میں داخلے کے لیے منعقد کیا گیا تھا۔

سالیسٹر جنرل نے درخواست پر سماعت شروع ہوتے ہی یہ اطلاع دی۔ درخواست میں کہا گیا تھا کہ اگر سوالیہ پرچہ لیک ہونے کی تصدیق ہوتی ہے تو آزادانہ تحقیقات مکمل ہونے اور متعلقہ مضامین کے امتحانات دوبارہ منعقد ہونے تک نتائج کے اعلان پر روک لگائی جائے۔ درخواست گزار امن سنگھ یادو نے 30 جون کو سماجیات کے امتحان میں شرکت کی تھی۔

یادو نے سوالیہ پرچہ لیک ہونے اور امتحان سے چند گھنٹے قبل اس کے تجارتی طور پر گردش میں آنے کے الزامات کی آزادانہ تحقیقات کا مطالبہ کیا تھا۔ درخواست میں کہا گیا تھا کہ درخواست گزار نے سوالیہ پرچے میں سنگین خامیوں اور پرچہ لیک ہونے کے سلسلے میں این ٹی اے سے شکایت کی تھی، لیکن اسے اب تک کوئی جواب نہیں ملا۔

درخواست میں مبینہ سوالیہ پرچہ لیک معاملے کی مرکزی تفتیشی بیورو (سی بی آئی) یا خصوصی تحقیقاتی ٹیم (ایس آئی ٹی) سے تحقیقات کرانے کی ہدایت دینے کی بھی اپیل کی گئی تھی۔ سماعت کے دوران سی بی آئی کی جانب سے مستقل وکیل پریمتوش مشرا پیش ہوئے۔ این ٹی اے نے ایک عوامی نوٹس میں کہا کہ اسے تین مضامین کے سوالیہ پرچوں میں متعدد خامیوں کے حوالے سے کئی شکایات موصول ہوئی تھیں اور ان معاملات کی تحقیقات کے لیے ایک کمیٹی تشکیل دی گئی تھی۔ یہ معاملہ این ٹی اے کے لیے ایک اور چیلنج کے طور پر سامنے آیا ہے، جس نے امتحانی نظام میں وسیع پیمانے پر اصلاحات کا اعلان کیا ہے۔