نئی دہلی: حکومت نے بدھ کے روز راجیہ سبھا میں کہا کہ 2027 کی مردم شماری شروع ہونے سے پہلے دوسرے مرحلے میں پوچھے جانے والے ذات سے متعلق سوالات کو نوٹیفائی کیا جائے گا۔ مرکزی وزیر مملکت برائے داخلہ نتیانند رائے نے ایک سوال کے تحریری جواب میں بتایا کہ ہر مردم شماری سے پہلے مختلف وزارتوں، محکموں، تنظیموں اور مردم شماری کے اعداد و شمار استعمال کرنے والوں سے موصول ہونے والی تجاویز اور معلومات کی بنیاد پر سوالات کو حتمی شکل دی جائے گی۔

انہوں نے کہا، "دوسرے مرحلے کے لیے ذات سمیت سوالات کو طے شدہ طریقہ کار کے مطابق حتمی شکل دے کر نوٹیفائی کیا جائے گا۔" رائے نے بتایا کہ مردم شماری دو مراحل میں منعقد کی جائے گی — اپریل سے ستمبر 2026 تک رہائشی فہرست سازی اور رہائشی گنتی، اور فروری 2027 میں آبادی کی گنتی۔

رہائشی فہرست سازی کے دوران ملک بھر کی تمام عمارتوں، گھروں اور خاندانوں کی منظم فہرست تیار کی جائے گی، تاکہ آبادی کی گنتی کے لیے مضبوط بنیاد فراہم ہو سکے۔ مرکزی کابینہ نے بھارت کی 2027 کی مردم شماری کے لیے 11,718 کروڑ روپے کی منظوری دی ہے، جس میں پہلی بار ذات کی گنتی بھی شامل ہوگی۔ یہ 16ویں مردم شماری ہوگی اور اسے مکمل طور پر ڈیجیٹل طریقے سے منعقد کیا جائے گا، جس میں شہریوں کو خود اپنی معلومات درج کرنے کا اختیار بھی دیا جائے گا۔ یہ عمل 2021 میں ہونا تھا، لیکن کووڈ وبا کے باعث اسے ملتوی کر دیا گیا تھا۔