سمبھل، 12 اکتوبر (پی ٹی آئی)۔ مشہور ہیئر اسٹائلسٹ جاوید حبیب، ان کے بیٹے انوس حبیب اور ایک دیگر شخص کے خلاف مبینہ طور پر سرمایہ کاروں سے دھوکہ دہی کے الزام میں 32 مقدمات درج کیے گئے ہیں۔

پولیس کے مطابق جاوید حبیب اور ان کے ساتھیوں پر الزام ہے کہ انہوں نے فولیکل گلوبل کمپنی (FLC) کے بینر تلے ایک اسکیم چلائی، جس میں انہوں نے سرمایہ کاروں سے فی کس 5 سے 7 لاکھ روپے لیے اور وعدہ کیا کہ بٹ کوائن کی خریداری پر 50 سے 70 فیصد منافع دیا جائے گا۔

سمبھل کے سپرنٹنڈنٹ آف پولیس کرشن کمار وشوئی نے بتایا کہ ملزمان نے سرمایہ کاروں سے رقم جمع کر کے اعلیٰ منافع کا لالچ دیا، مگر ڈھائی سال گزرنے کے باوجود کسی کو بھی اپنی رقم واپس نہیں ملی۔ ابتدائی تفتیش کے مطابق دھوکہ دہی کا یہ معاملہ تقریباً 5 سے 7 کروڑ روپے تک پہنچتا ہے۔

پولیس نے جاوید حبیب اور ان کے اہلِ خانہ کو ملک سے باہر جانے سے روکنے کے لیے لوک آؤٹ نوٹس بھی جاری کیا ہے۔

رایہ ستی پولیس اسٹیشن کے انچارج گووند کمار نے بتایا کہ تفصیلی تفتیش کے بعد جاوید حبیب، ان کے بیٹے انوس حبیب اور ایک ساتھی سیف الاسلام کے خلاف 32 ایف آئی آرز درج کی گئی ہیں۔ ان تینوں کو پوچھ گچھ کے لیے طلب کیا گیا ہے۔ اتوار کو جاوید حبیب کے وکیل پون کمار نے پولیس سے ملاقات کی اور ان کی خراب صحت کے حوالے سے میڈیکل دستاویزات جمع کرائیں۔

پون کمار نے بتایا کہ ان کے مؤکل کو دل کی تکلیف ہے اور حال ہی میں ان کے والد کا انتقال ہوا ہے، اسی وجہ سے وہ ذاتی طور پر پیش نہیں ہو سکے۔ انہوں نے کہا کہ وہ پولیس سے مکمل تعاون کر رہے ہیں۔

پون کمار نے کہا، ’’میرے مؤکل کو عدلیہ اور آئین پر مکمل بھروسہ ہے۔ ہمیں یقین ہے کہ پولیس انصاف کے تقاضوں کے مطابق کارروائی کرے گی۔ الزامات کی تحقیقات جاری ہیں اور ہم ہر مرحلے پر تعاون کے لیے تیار ہیں۔‘‘

پولیس حکام نے تصدیق کی ہے کہ اس مبینہ سرمایہ کاری اسکینڈل کی تحقیقات جاری ہیں، جس میں ضلع بھر سے متعدد متاثرین نے شکایت درج کرائی ہے۔