اندور/ آواز دی وائس

پولیس نے بدھ کو بتایا کہ اداکار اعجاز خان کے خلاف اندور کے بدنام زمانہ گینگسٹر سلمان لالا کی موت پر سوشل میڈیا پلیٹ فارم پر "قابل اعتراض" ویڈیو اپ لوڈ کرنے اور مبینہ طور پر فرقہ وارانہ دشمنی کو ہوا دینے کے الزام میں مقدمہ درج کیا گیا ہے۔ایڈیشنل ڈپٹی کمشنر آف پولیس راجیش ڈنڈوٹیا نے کہا کہ خان کے خلاف مقامی رہائشی ارشاد حکیم کی شکایت پر بھارتیہ نیایا سنہیتا (بی این ایس) کی دفعات 196 (فرقہ وارانہ دشمنی کو فروغ دینا)، 223 (سرکاری احکامات کی خلاف ورزی)، 353 (1)(ب) اور 353 (1)(ج) (عوامی فساد پھیلانے والے بیانات) کے تحت مقدمہ درج کیا گیا ہے۔

خان، جو پہلے رئیلٹی شو ’بگ باس 7‘ میں نظر آچکے ہیں، نے اپنے انسٹاگرام اکاؤنٹ پر ایک ویڈیو "اسٹوری" فیچر کے ذریعے شیئر کی تھی، جو 24 گھنٹے بعد خود بخود غائب ہو جاتی ہے۔ یہ ویڈیو گینگسٹر سلمان لالا کی موت سے متعلق تھی۔ شکایت کے مطابق، اس ویڈیو میں خان نے مبینہ طور پر ایسی باتیں کہیں جو نفرت اور دو کمیونٹیوں میں دشمنی پھیلانے کا باعث بنیں۔

ڈنڈوٹیا نے کہا کہ پولیس نے معاملے کی تحقیقات شروع کر دی ہیں۔ پولیس انسٹاگرام کی پیرنٹ کمپنی میٹا کو ای میل بھیج رہی ہے تاکہ 44 سالہ اداکار کے اکاؤنٹ کے مواد کا تجزیہ کیا جائے اور مناسب کارروائی کی جائے۔

پولیس نے گزشتہ ماہ اندور میں منشیات کے دھندے سے جڑے ایک کیس میں سیہور بائی پاس روڈ پر گھات لگا کر چار افراد کو گرفتار کیا تھا۔ اس دوران گینگسٹر لالا وہاں سے فرار ہوگیا تھا، تاہم بعد میں اس کی لاش ایک تالاب سے ملی۔ لالا کے اہل خانہ نے الزام لگایا ہے کہ پولیس نے اسے حراست میں قتل کیا ہے اور دعویٰ کیا کہ وہ سمندر میں تیرنے کا بھی تجربہ رکھتا تھا۔ تاہم ڈنڈوٹیا نے ان الزامات کو بے بنیاد قرار دیا۔

انہوں نے کہا کہ لالا کی موت بظاہر تالاب میں ڈوبنے سے ہوئی ہے۔ بھوپال کے سرکاری اسپتال میں ڈاکٹروں کی ایک کمیٹی نے پوسٹ مارٹم کیا تھا اور شفافیت کو یقینی بنانے کے لیے اس پورے عمل کی ویڈیو ریکارڈنگ کی گئی تھی۔ ڈنڈوٹیا نے کہا کہ سیہور پولیس لالا کی موت کی تحقیقات کر رہی ہے اور اگر اس کے اہل خانہ کو کوئی اعتراض ہے تو وہ پولیس کے سامنے اپنا بیان ریکارڈ کرا سکتے ہیں۔

پولیس کے مطابق لالا کے خلاف 32 سنگین مقدمات درج تھے۔ اس دوران سوشل میڈیا پر لالا کو ہیرو بنا کر پیش کرنے اور پولیس کے دعوے پر سوال اٹھانے والی پوسٹس کی بھرمار ہے۔ ڈنڈوٹیا نے کہا کہ لالا کی موت کے بارے میں گمراہ کن اور اشتعال انگیز پروپیگنڈہ کرنے والے سوشل میڈیا اکاؤنٹس کی نشاندہی کی جا رہی ہے۔ اب تک 90 ایسے اکاؤنٹس کی شناخت کی جا چکی ہے جن کے خلاف قانونی کارروائی کی جا رہی ہے۔ لالا کی موت کے بعد اس کے نام سے کئی جعلی اکاؤنٹس بھی بنائے گئے ہیں۔

انہوں نے مزید بتایا کہ شہر کی ایک کم عمر لڑکی کا سوشل میڈیا اکاؤنٹ ہیک کر لیا گیا تھا اور اس پر لالا کے حق میں ریل پوسٹ کی گئی تھی، پولیس اس معاملے کی بھی تحقیقات کر رہی ہے۔