اوٹاوا/ آواز دی وائس

کینیڈا کی وزیرِ خارجہ انیتا آنند اس وقت ہندوستان کے دورے پر ہیں۔ ان کا یہ دو روزہ دورہ ہے اور 2023 کے بعد کسی بھی کینیڈیائی وزیر کا یہ پہلا ہندوستانی دورہ ہے۔ آج انہوں نے ہندوستانی وزیرِ خارجہ ایس۔ جے شنکر سے ملاقات کی۔

دونوں رہنماؤں کے درمیان ہندوستان اور کینیڈا کی شراکت داری کو آگے بڑھانے کے لیے ضروری معاملات کو دوبارہ قائم اور متحرک کرنے پر تعمیری گفتگو ہوئی۔ اس دوران دونوں نے عالمی حالات اور مشترکہ چیلنجز پر بھی تبادلۂ خیال کیا۔ دونوں ممالک کے وزرائے خارجہ ایک پرعزم تعاون روڈ میپ پر بھی متفق ہوئے۔ بات چیت کے دوران جے شنکر اور انیتا نے دونوں ملکوں کے تعاون کی بحالی کے عمل کی قیادت کرنے پر اتفاق کیا تاکہ ہندوستان اور کینیڈا کے رہنماؤں کی توقعات اور دونوں ممالک کے عوام کے مفادات کو مدنظر رکھا جا سکے۔=

وزیرِاعظم نریندر مودی سے تعلقات مضبوط کرنے پر گفتگو

آج دہلی میں انیتا آنند نے وزیرِاعظم نریندر مودی سے بھی ملاقات کی۔ جون میں G7 سربراہی اجلاس کے دوران وزیرِاعظم مودی اور کینیڈا کے وزیرِاعظم مارک کارنی کی ملاقات کے بعد ہندوستان اور کینیڈا کے درمیان تعلقات کو مزید مضبوط کیا جا رہا ہے۔ دونوں ملک قانون نافذ کرنے اور سلامتی کے مذاکرات کو برقرار رکھتے ہوئے اپنے اقتصادی روابط کو بھی وسعت دے رہے ہیں۔ وزیرِاعظم مودی اور انیتا آنند کے درمیان ہندوستان–کینیڈا کے باہمی ترقی و خوشحالی کے لیے تجارت، ٹیکنالوجی، توانائی، زراعت اور عوامی تبادلے میں تعاون کو مضبوط کرنے کے طریقوں پر بھی بات چیت ہوئی۔

پیوش گوئل سے بھی ملاقات ہوگی

کینیڈا کی وزیرِ خارجہ انیتا آنند اپنے ہندوستانی دورے کے دوران آج وزیرِ تجارت و صنعت پیوش گوئل سے بھی ملاقات کریں گی۔ اس ملاقات کے دوران ہندوستان اور کینیڈا کے درمیان تجارتی تعلقات کو فروغ دینے پر گفتگو ہونے کا امکان ہے۔