نئی دہلی:سپریم کورٹ نے پیر کے روز کہا کہ وہ مغربی بنگال میں خصوصی گہری نظرثانی (ایس آئی آر) کے عمل کے لیے قائم اپیلیٹ ٹریبونلز کے “کام نہ کرنے” کے الزامات کے پیش نظر کلکتہ ہائی کورٹ کے چیف جسٹس سے آج ہی رپورٹ طلب کرے گا۔

سینئر وکیل دیودت کامت نے چیف جسٹس سوریہ کانت اور جسٹس جوئمالیہ باغچی کی بنچ کے سامنے اس معاملے کا ذکر کیا۔ کامت نے کہا، “یہ مغربی بنگال میں ایس آئی آر کا معاملہ ہے۔ معزز جج صاحبان نے اس کیس کو 24 اپریل کے لیے مقرر کیا ہے۔ اپیلیٹ ٹریبونلز کام نہیں کر رہے۔ وکلا کو اجازت نہیں دی جا رہی۔ وہ صرف انٹرنیٹ اور کمپیوٹر پر مبنی درخواستیں ہی قبول کر رہے ہیں۔”

چیف جسٹس نے اس بات پر ناراضی ظاہر کی کہ مغربی بنگال میں ایس آئی آر سے متعلق معاملات تقریباً روزانہ عدالت کے سامنے لائے جا رہے ہیں۔ تاہم، کامت نے مؤقف اختیار کیا کہ اس معاملے میں سپریم کورٹ کے احکامات پر عمل نہیں کیا جا رہا۔ اس پر چیف جسٹس نے کہا، “ہم (ہائی کورٹ کے) چیف جسٹس سے آج ہی رپورٹ طلب کریں گے۔”

مغربی بنگال اسمبلی کے انتخابات 23 اور 29 اپریل کو دو مرحلوں میں ہوں گے، جبکہ ووٹوں کی گنتی 4 مئی کو ہوگی۔ اعلیٰ عدالت نے گزشتہ ہفتے اس معاملے کی سماعت کے دوران الیکشن کمیشن کو ہدایت دی تھی کہ جن ووٹروں کے نام حذف کیے جانے کے خلاف اپیلیٹ ٹریبونلز میں دائر اپیلیں منظور ہو جائیں، انہیں شامل کرتے ہوئے ضمنی نظرثانی شدہ ووٹر فہرست جاری کی جائے۔