نئی دہلی: پاکستان اور بنگلہ دیش کے ساتھ جڑی ہندوستان کی سرحدوں کی حفاظت کرنے والا بارڈر سیکیورٹی فورس (بی ایس ایف) جدید جنگی صلاحیتوں کے لیے اپنی خصوصی یونٹ ’ڈرون کمانڈو‘ اور ’ڈرون یودھا‘ کو ریموٹ سے چلنے والے فضائی پلیٹ فارم سمیت مختلف تربیت فراہم کر رہا ہے تاکہ انہیں ’آپریشن سندور‘ جیسے مشنز میں تعینات کیا جا سکے۔

بی ایس ایف کے ڈائریکٹر جنرل، دلجیت سنگھ چودھری نے منگل کے روز مدھیہ پردیش کے ٹیکن پور میں فورس کی افسران کی تربیتی اکیڈمی میں ’ڈرون وار اسکول‘ کا افتتاح کیا۔ ’پی ٹی آئی-بھاشا‘ نے جولائی میں خبر دی تھی کہ تقریباً 2.65 لاکھ اہلکاروں والا بی ایس ایف ’آپریشن سندور‘ سے سبق لیتے ہوئے اپنا پہلا ’ڈرون اسکواڈرن‘ قائم کر رہا ہے۔

فورس کے ایک ترجمان نے کہا، ’’ڈرون وار اسکول، سرحدی محافظوں کو جدید اسٹریٹجک چیلنجز سے نمٹنے کے لیے خصوصی تربیت فراہم کرے گا۔‘‘ انہوں نے مزید کہا، ’’یہ ادارہ پانچ خصوصی کورسز کے ذریعے ڈرون کمانڈو اور ڈرون یودھا تیار کرے گا جن میں بغیر پائلٹ کے فضائی گاڑی (یو اے وی) کا آپریشن، ڈرون مخالف جنگ، نگرانی اور خفیہ معلومات اکٹھا کرنا شامل ہے۔‘‘

اس اسکول میں ’سیمیولیٹر‘ اور ’لائیو ڈرون فلائنگ زون‘، یو اے وی اور ’پے لوڈ انٹیگریشن‘ کی سہولتیں، رات میں آپریشن کرنے کی تربیت، ریڈیو فریکوئنسی (آر ایف) جیمر اور ’کائنیٹک انٹرسیپٹر‘ کے آلات، ’لنکڈ ہارڈویئر‘ اور مصنوعی ذہانت (اے آئی) سے لیس ٹولز موجود ہوں گے۔

ایک سینئر افسر نے بتایا کہ اسکول کے افتتاح کے بعد، بی ایس ایف ڈائریکٹر جنرل نے تربیت حاصل کرنے والے افسران سے خطاب کیا اور تین سال سے جاری روس-یوکرین جنگ پر بات کی، جس میں ڈرونز نے ایک اہم کردار ادا کیا ہے۔ ڈائریکٹر جنرل نے یہ بھی کہا کہ پہلگام میں دہشت گردانہ حملے کے جواب میں پاکستان کے خلاف ہندوستان کی جانب سے کی گئی ’آپریشن سندور‘ سے اسٹریٹجک سبق لیا گیا ہے۔

اگست میں یومِ آزادی کے موقع پر، ’آپریشن سندور‘ کے دوران ’غیر معمولی بہادری‘ اور ’بے مثال شجاعت‘ کا مظاہرہ کرنے پر بی ایس ایف کے 18 جوانوں کو بہادری کے تمغوں سے نوازا گیا۔ ان میں دو ایسے اہلکار بھی شامل تھے جنہیں بعد از مرگ فوج کے ’ویر چکر‘ سے اعزاز دیا گیا۔

یہ فورس ان پاکستانی ڈرونز سے بھی نمٹتی ہے جو چین میں تیار کیے گئے ہیں اور جن کے ذریعے مغربی حصے میں بین الاقوامی سرحد کے پار سے ہندوستان میں روزانہ منشیات، اسلحہ اور گولہ بارود کی اسمگلنگ کی جاتی ہے۔