نئی دہلی/ آواز دی وائس
دہلی کے نظام الدین میں بالی وڈ فلم اداکارہ ہما قریشی کے کزن بھائی کا قتل کر دیا گیا۔ گھر کے قریب پارکنگ کے مسئلے پر شروع ہونے والا جھگڑا اس حد تک بڑھ گیا کہ آصف قریشی کی جان لے لی گئی۔ ایک شخص نے اپنی اسکوٹی آصف کے گھر کے باہر کھڑی کر دی تھی۔ جب آصف نے اسکوٹی ہٹانے کو کہا تو تکرار شروع ہوئی اور بات قتل تک پہنچ گئی۔
بھائی پر نوکیلے ہتھیار سے حملہ کیا گیا
آصف قریشی کے بھائی جاوید نے بتایا کہ رات تقریباً 10:30 بجے بھابھی کا فون آیا، انہوں نے کہا کہ بھائی کو بہت مارا گیا ہے، بھائی کا قتل ہو گیا ہے۔ یہ سن کر میں فوراً دکان چھوڑ کر یہاں آ گیا۔ ان پر نوکیلے ہتھیار سے حملہ کیا گیا۔ پارکنگ کے مسئلے پر جھگڑا شروع ہوا تھا۔ اس سے پہلے بھی دو بار بھائی کا ان سے جھگڑا ہو چکا تھا، لیکن پولیس میں کوئی شکایت درج نہیں کرائی گئی تھی۔ قاتلوں کا گھر بھی قریب ہی ہے۔
آصف بہت اچھا انسان تھا
آصف قریشی کے پڑوسیوں نے بتایا کہ آصف ایک بہترین بیٹا اور اچھا انسان تھا، سب سے محبت کرتا تھا۔ ایک چھوٹے سے جھگڑے نے اس کی جان لے لی۔ آصف کی بیوی کا رویہ بھی بہت اچھا ہے۔ معمولی بات پر جھگڑا دیکھتے ہی دیکھتے قتل تک پہنچ گیا۔
پولیس کی معلومات
پولیس نے کیس درج کر کے تحقیقات شروع کر دی ہیں۔ اس معاملے میں دو افراد کو گرفتار کیا گیا ہے اور قتل میں استعمال ہونے والا ہتھیار بھی برآمد کر لیا گیا ہے۔ پولیس کے مطابق رات تقریباً 11 بجے گھر کے قریب آصف نے پارکنگ سے منع کیا، جس کے بعد ملزمان نے نوکیلے ہتھیار سے ان پر حملہ کر دیا۔ آصف کو اسپتال لے جایا گیا جہاں ڈاکٹروں نے انہیں مردہ قرار دے دیا۔
