چھترپتی سمبھاجی نگر: مہاراشٹر کے چھترپتی سمبھاجی نگر میں بمبئی ہائی کورٹ کی کلرک بھرتی کے لیے منعقدہ ٹائپنگ امتحان میں تکنیکی خرابیوں کے خلاف احتجاج کرنے والے امیدواروں نے اتوار کی دیر رات اپنا احتجاج ختم کردیا۔ تاہم، انہوں نے انتظامیہ کو مسائل دور کرنے اور دوبارہ امتحان منعقد کرنے کا اعلان کرنے کے لیے ایک ہفتے کا وقت دیا ہے۔

اتوار کو احتجاج میں شامل کاکروچ جنتا پارٹی (کاجپا) کے کنوینر ابھیجیت دیپکے نے امتحان میں سامنے آنے والی تکنیکی خرابیوں کو ’’نظام کی ناکامی‘‘ قرار دیتے ہوئے امیدواروں کے مطالبات کی حمایت کی۔ بمبئی ہائی کورٹ کے رجسٹرار (پرسنل) کی جانب سے اتوار کو جاری ایک اطلاع میں کہا گیا کہ ایجنسی کے ذریعے کلرک کے عہدے کے لیے منعقدہ ٹائپنگ امتحان مجموعی طور پر خوش اسلوبی سے ہوا، تاہم کچھ امتحانی مراکز، خاص طور پر اورنگ آباد (چھترپتی سمبھاجی نگر) اور کلیان (تھانے ضلع) میں تکنیکی مسائل سامنے آئے۔

اطلاع کے مطابق ایجنسی کے ذریعے کرائے گئے امتحان کے عمل میں سامنے آنے والی تکنیکی خرابیوں کی جانچ کی جا رہی ہے اور آئندہ مناسب کارروائی کے بارے میں امیدواروں کو سرکاری اطلاع کے ذریعے آگاہ کیا جائے گا۔ امیدواروں نے شکایت کی کہ امتحان کے دوران کمپیوٹر بند ہوگئے، جبکہ بعض امیدواروں نے بتایا کہ کمپیوٹر کی اسکرین پیلی ہوگئی اور کی بورڈ نے کام کرنا بند کردیا۔

چھترپتی سمبھاجی نگر کے مختلف مراکز پر مراٹھواڑہ اور ودربھ کے تقریباً 2,900 امیدواروں نے امتحان میں شرکت کی۔ جبکہ پورے مہاراشٹر میں تقریباً 13,000 امیدوار اس امتحان کے لیے اہل تھے۔ یہ امتحان ہائی کورٹ کی ناگپور اور اورنگ آباد بنچوں کے تحت کل 1,300 کلرک کی آسامیوں کے لیے تین شفٹوں میں منعقد کیا گیا تھا۔ امتحان میں شریک کئی امیدواروں نے اتوار کو چھترپتی سمبھاجی نگر میں احتجاج شروع کردیا۔ دیپکے نے الزام لگایا کہ کئی امیدواروں کو ان کی کسی غلطی کے بغیر ہی ناکام قرار دے دیا گیا۔

انہوں نے دوبارہ امتحان منعقد کرنے کا مطالبہ کیا۔ تاہم امیدواروں نے اتوار کی دیر رات اپنا احتجاج ختم کردیا اور انتظامیہ سے مطالبہ کیا کہ ایک ہفتے کے اندر ضروری اصلاحات کرکے دوبارہ امتحان منعقد کرنے کا اعلان کیا جائے۔ بعد میں صحافیوں سے بات کرتے ہوئے دیپکے نے کہا کہ اگر ایک ہفتے کے اندر مسئلہ حل نہیں کیا گیا تو پورے مہاراشٹر میں احتجاج کیا جائے گا۔ انہوں نے الزام لگایا، ’’اتوار کو کئی مراکز پر امتحان منعقد کیا گیا تھا، لیکن امتحان کے دوران کمپیوٹر اور کی بورڈ صحیح طریقے سے کام نہیں کر رہے تھے۔ سرور میں بھی خرابی تھی۔ کئی امیدواروں کو امتحان مکمل کیے بغیر ہی ناکام قرار دے دیا گیا۔‘‘

انہوں نے کہا، ’’یہ نظام کی ناکامی ہے اور ملازمت کے امیدوار اسی کے خلاف احتجاج کر رہے تھے۔ ہائی کورٹ نے بھی اس احتجاج کا نوٹس لیا ہے اور کہا ہے کہ وہ مسائل کی جانچ کرے گی اور ضروری اقدامات کرے گی۔‘‘ تاہم مظاہرین مکمل طور پر مطمئن نہیں ہیں۔

دیپکے نے کہا کہ انہوں نے دوبارہ امتحان منعقد کرنے سمیت دیگر مطالبات پر مثبت کارروائی کے لیے ایک ہفتے کا وقت دیا ہے۔ انہوں نے کہا کہ ان کا سب سے بڑا مطالبہ دوبارہ امتحان منعقد کرنا ہے اور یہ امتحان کسی تیسری ایجنسی کے بجائے ہائی کورٹ کی نگرانی میں کرایا جانا چاہیے۔ انہوں نے خبردار کیا کہ اگر کوئی مثبت قدم نہیں اٹھایا گیا تو امیدواروں کے پاس دوبارہ احتجاج کرنے کے علاوہ کوئی راستہ نہیں بچے گا۔ ان کے مطابق اس مرتبہ احتجاج مزید بڑا اور پورے مہاراشٹر میں ہوگا اور مطالبات پورے ہونے تک جاری رہے گا۔