نئی دہلی: بھارتیہ جنتا پارٹی (بی جے پی) نے پیر کو پارٹی صدر نتن نوین کی قیادت میں اپنی نئی قومی ٹیم کا اعلان کردیا۔ نئی ٹیم میں رام مادھو، لوک سبھا رکن ڈی. پروندیشوری اور اتراکھنڈ کے سابق وزیراعلیٰ تیرتھ سنگھ راوت سمیت 13 افراد کو قومی نائب صدر مقرر کیا گیا ہے۔

مرکزی وزیر پیوش گوئل کو پارٹی کا قومی خزانچی بنایا گیا ہے۔ بی جے پی کی جانب سے جاری فہرست کے مطابق بی ایل سنتوش کو قومی جنرل سکریٹری (تنظیم) کے عہدے پر برقرار رکھا گیا ہے۔ وہیں پارٹی کے آٹھ قومی جنرل سکریٹریوں کی ٹیم میں سابق مرکزی وزیر اسمرتی ایرانی اور تریپورہ کے سابق وزیراعلیٰ بپلپ کمار دیب کو شامل کیا گیا ہے۔

ونود تاؤڑے اور سنیل بنسل وہ دو قومی جنرل سکریٹری ہیں جنہیں پارٹی نے نئی ٹیم میں بھی برقرار رکھا ہے۔ بی جے پی نے مختلف ریاستوں سے تعلق رکھنے والے 16 قومی سکریٹریوں کی ٹیم میں کویتا پاٹیدار، کے. سریندرن، سندیپ پاٹھک اور منوج تگّا سمیت کئی نئے چہروں کو شامل کیا ہے۔ راجستھان کی سابق وزیراعلیٰ وسندھرا راجے سندھیا کے علاوہ وجیانت جے پانڈا اور ریکھا ورما کو بھی قومی نائب صدور کے عہدے پر برقرار رکھا گیا ہے۔