نئی دہلی:سپریم کورٹ نے پیر کے روز اس عرضی پر سماعت کرنے پر رضامندی ظاہر کی ہے جس میں پولنگ اسٹیشنز پر فرضی ووٹنگ کو روکنے کے لیے الیکشن کمیشن کو بایومیٹرک نظام نافذ کرنے کی ہدایت دینے کی درخواست کی گئی ہے، جس میں انگلیوں کے نشانات اور آنکھوں کی پتلی (آئرس) کے ذریعے شناخت کو یقینی بنایا جائے۔

چیف جسٹس آف انڈیا سوریہ کانت اور جسٹس جوئمالیہ باگچی کی بنچ نے واضح کیا کہ عرضی میں کی گئی درخواست پر کچھ ریاستوں میں جاری اسمبلی انتخابات کے تناظر میں غور نہیں کیا جا سکتا۔ بنچ نے کہا: "تاہم، آئندہ پارلیمانی انتخابات اور/یا ریاستی اسمبلی انتخابات سے قبل اس طرح کے اقدام کو اپنانا مناسب ہے یا نہیں، اس کا جائزہ لینے کی ضرورت ہے۔

نوٹس جاری کریں۔" سپریم کورٹ نے وکیل اشوِنی کمار اپادھیائے کی جانب سے دائر اس عرضی پر مرکز، الیکشن کمیشن اور کئی دیگر ریاستوں سے جواب طلب کیا ہے۔ عرضی میں کہا گیا ہے کہ رشوت، ناجائز اثر و رسوخ اور فرضی ووٹنگ اب بھی انتخابی عمل کی شفافیت اور پاکیزگی کو متاثر کر رہے ہیں، جس کے باعث شہریوں کو بھاری نقصان اٹھانا پڑ رہا ہے۔