پٹنہ: بہار کی سیاست میں ان دنوں ایک بار پھر ہلچل تیز ہو گئی ہے۔ اسمبلی انتخابات کے نتائج کے بعد اگرچہ این ڈی اے اکثریت کے ساتھ دوبارہ اقتدار میں آ گیا ہے، لیکن وزیراعلیٰ کے عہدے کو لے کر جاری سسپنس ختم ہونے کا نام نہیں لے رہا۔ اسی دوران جنتا دل یونائیٹڈ (JDU) نے اپنے آفیشل سوشل میڈیا پلیٹ فارم ’ایکس‘ پر ایک ایسا پوسٹر جاری کیا ہے جس نے سیاسی حلقوں میں نئی بحث چھیڑ دی ہے۔

جے ڈی یو کی جانب سے جاری کیے گئے پوسٹر میں وزیراعلیٰ نتیش کمار کی بڑی تصویر لگائی گئی ہے، جس کے ساتھ لکھا ہے: "بہار ہے خوشحال، پھر سے آگئے نتیش کمار" کیپشن میں پارٹی نے مزید لکھا: "خوشحال ہے بہار… محفوظ ہے بہار"۔

اس پوسٹر کے سامنے آتے ہی سیاسی تجزیہ کاروں اور بہار کے عوام کے درمیان یہ سوال اٹھنے لگا ہے کہ کیا جے ڈی یو اس بات کا اشارہ دے رہی ہے کہ نتیش کمار ہی دوبارہ وزیراعلیٰ کا منصب سنبھالیں گے۔ ابھی تک این ڈی اے کی طرف سے وزیراعلیٰ کے نام کا باضابطہ اعلان نہیں کیا گیا ہے۔

بی جے پی، جے ڈی یو، ایل جے پی (رام ولاس)، ہم اور آر ایل ایم جیسے اتحادی جماعتوں کے اعلیٰ رہنما جلد ہی میٹنگ کر کے قیادت کا فیصلہ کریں گے۔ لیکن جے ڈی یو کے پوسٹر نے باضابطہ فیصلے سے پہلے ہی قیاس آرائیوں کے دروازے کھول دیے ہیں۔ یہ پوسٹر ایسے وقت میں جاری کیا گیا ہے جب بہار کی سیاست میں طاقت کے توازن اور وزیراعلیٰ کے چہرے کو لے کر مختلف قسم کے اندازے لگائے جا رہے تھے۔

قابلِ ذکر بات یہ ہے کہ این ڈی اے میں سب سے زیادہ نشستیں بی جے پی نے جیتی ہیں اور جے ڈی یو دوسرے نمبر پر ہے۔ اس کے باوجود جے ڈی یو مسلسل نتیش کمار کو قابلِ قبول لیڈر اور ’سُشاسن‘ کا چہرہ قرار دیتی رہی ہے، یہی وجہ ہے کہ پوسٹر کا پیغام ایک غیر علانیہ دعوے کے طور پر دیکھا جا رہا ہے۔

سیاسی مبصرین کا کہنا ہے کہ یہ پوسٹر جے ڈی یو کی جانب سے عوام اور اتحاد دونوں کے لیے یہ اشارہ ہے کہ پارٹی نتیش کمار کے متبادل پر غور کرنے کے حق میں نہیں ہے۔ ادھر بی جے پی کی طرف سے بھی کوئی کھلا اختلاف سامنے نہیں آیا، جس سے اندازہ لگایا جا رہا ہے کہ شاید فیصلہ پردے کے پیچھے پہلے ہی طے ہو چکا ہے۔

اب سب کی نظریں این ڈی اے کی آئندہ باضابطہ میٹنگ پر لگی ہیں، جہاں وزیراعلیٰ کے نام پر آخری مہر لگے گی۔ البتہ اتنا ضرور ہے کہ جے ڈی یو کے اس پوسٹر نے سسپنس مزید بڑھا دیا ہے اور بہار کی سیاست میں ایک بار پھر نتیش کمار کے کردار کو بحث کے مرکز میں لا کھڑا کیا ہے۔