پٹنہ/ آواز دی وائس

جن سوراج پارٹی کے بانی پرشانت کشور نے بدھ کے روز اعلان کیا کہ وہ بہار اسمبلی انتخابات نہیں لڑیں گے۔ اُنہوں نے کہا کہ یہ فیصلہ پارٹی کے مفاد میں لیا گیا ہے۔ پرشانت کشور نے کہا کہ نہیں، میں انتخاب نہیں لڑوں گا۔ پارٹی نے یہ فیصلہ کیا ہے کہ میرے پاس جو پہلے سے کام ہیں، اگر میں انہیں پوری طرح انجام دوں تو یہی کافی ہے۔ اگر میں انتخاب لڑنے جاؤں گا تو دو چار دن کا نقصان ہوگا۔ میں وہی کام کرتا رہوں گا جو ابھی کر رہا ہوں۔

پرشانت کشور نے یہ بھی کہا کہ 150 سے کم نشستیں اُن کے لیے شکست کے مترادف ہوں گی۔ انہوں نے کہا کہ 150 سے کم نشستیں، چاہے 120 یا 130 ہی کیوں نہ ہوں، میرے لیے ہار ہوں گی۔ اگر ہم اچھا مظاہرہ کرتے ہیں تو ہمیں بہار کو بدلنے اور اُسے ملک کی دس سب سے ترقی یافتہ ریاستوں میں شامل کرنے کا عوامی مینڈیٹ ملے گا۔ اگر ہم اچھا مظاہرہ نہیں کرتے تو اس کا مطلب ہوگا کہ عوام نے ہم پر اعتماد نہیں کیا، اور ہمیں اپنی سماجی و زمینی سیاست جاری رکھنی ہوگی۔

بدعنوان رہنماؤں کے بارے میں پرشانت کشور کا بیان

جن سوراج کے سربراہ نے یہ بھی کہا کہ اگر اُن کی پارٹی اقتدار میں آئی تو ایک نیا قانون بنایا جائے گا جس کے تحت 100 سب سے زیادہ بدعنوان رہنماؤں کے خلاف مقدمہ چلایا جائے گا اور اُنہیں سزا دی جائے گی۔ پی ٹی آئی سے گفتگو میں اُنہوں نے کہا کہ یہ اُن تمام رہنماؤں اور افسروں کے لیے انتباہ ہے جو دعا کر رہے ہیں کہ جن سوراج اقتدار میں نہ آئے، کیونکہ اُنہیں معلوم ہے کہ اگر جن سوراج حکومت بنی تو اُن کے برے دن شروع ہو جائیں گے۔

پرشانت کشور نے بہار میں حکمراں این ڈی اے کی یقینی ہار کی پیشگوئی کرتے ہوئے کہا کہ نتیش کمار کی قیادت والی جے ڈی یو کو 25 نشستیں جیتنے کے لیے بھی سخت جدوجہد کرنی پڑے گی۔ انہوں نے کہا کہ این ڈی اے یقینی طور پر ختم ہونے جا رہا ہے اور نتیش کمار دوبارہ وزیر اعلیٰ کے طور پر واپس نہیں آئیں گے۔

انہوں نے یاد دلاتے ہوئے کہا کہ جے ڈی یو کے لیے کیا ہونے والا ہے، یہ جاننے کے لیے کسی انتخابی ماہر ہونے کی ضرورت نہیں ہے۔ گزشتہ اسمبلی انتخابات میں چراغ پاسوان نے انتخابی اعلان سے چند دن پہلے ہی بغاوت کر دی تھی اور کمار کی پارٹی کے امیدواروں کے خلاف اپنے امیدوار کھڑے کر دیے تھے۔ اس کی وجہ سے پارٹی کی نشستوں کی تعداد گھٹ کر 43 رہ گئی تھی۔

واضح رہے کہ بہار اسمبلی انتخابات دو مرحلوں میں 6 اور 11 نومبر کو ہوں گے، جبکہ ووٹوں کی گنتی 14 نومبر کو کی جائے گی۔