نئی دہلی: ترنمول کانگریس کو اس وقت ایک اور بڑا سیاسی جھٹکا لگا جب پارٹی کی مغربی بنگال یونٹ کی صدر چندریما بھٹاچاریہ نے ہفتے کے روز اپنے عہدے سے استعفیٰ دے دیا۔ اسمبلی انتخابات میں پارٹی کی شکست کے بعد انہیں تنظیم کی اہم ذمہ داری سونپے جانے کے بمشکل ایک ماہ بعد ہی انہوں نے نہ صرف ریاستی صدر کے عہدے سے بلکہ پارٹی میں اپنے تمام دیگر عہدوں سے بھی استعفیٰ دے دیا۔

اس اقدام کے بعد یہ قیاس آرائیاں شروع ہو گئی ہیں کہ آیا انہوں نے ممتا بنرجی کے دھڑے سے اپنے تمام تعلقات ختم کر لیے ہیں۔ ترنمول کانگریس کی سربراہ ممتا بنرجی کو لکھے گئے اپنے استعفے میں چندریما بھٹاچاریہ نے پارٹی کے مختلف بینک کھاتوں کی مجاز دستخط کنندہ اور الیکشن کمیشن کے سامنے ممتا بنرجی کی مجاز نمائندہ کی حیثیت سے بھی اپنا نام واپس لے لیا۔

چندریما بھٹاچاریہ ممتا بنرجی کی گزشتہ حکومت میں وزیر رہ چکی ہیں اور انہوں نے مالیات اور صحت جیسے اہم محکموں کی ذمہ داریاں سنبھالی تھیں۔ وہ پارٹی کی خواتین تنظیم کی بھی اہم رہنما رہی ہیں اور ممتا بنرجی کی قریبی ساتھیوں میں شمار کی جاتی تھیں۔

یاد رہے کہ 5 جون کو کولکاتا کے کالی گھاٹ میں ممتا بنرجی کی رہائش گاہ پر منعقدہ ترنمول کانگریس کی قومی ورکنگ کمیٹی کے اجلاس میں چندریما بھٹاچاریہ کو سینئر رہنما سبرت بخشی کی جگہ ریاستی صدر مقرر کیا گیا تھا۔ اپنے استعفے کے آخر میں انہوں نے ممتا بنرجی کے لیے احترام کا اظہار کرتے ہوئے لکھا، ’’میرے دل میں آپ کے لیے بے حد عزت ہے اور میں ہمیشہ آپ کا احترام کرتی رہوں گی۔‘‘