نئی دہلی: نیشنل انویسٹی گیشن ایجنسی (این آئی اے) نے سی پی آئی (ماؤ نواز) کی مبینہ سازش سے متعلق ایک مقدمے میں چھٹے ملزم کے خلاف چارج شیٹ داخل کر دی ہے۔ یہ مقدمہ مگدھ زون میں کالعدم تنظیم کی سرگرمیوں کو دوبارہ فعال کرنے اور اسلحہ و گولہ بارود کی خریداری کے لیے ٹھیکیداروں سے جبری وصولی کرنے سے متعلق ہے۔

این آئی اے کی جانب سے جاری ایک سرکاری بیان کے مطابق، رانچی (جھارکھنڈ) میں واقع این آئی اے کی خصوصی عدالت میں داخل کی گئی اپنی تیسری چارج شیٹ میں چندن کمار کو مقدمہ RC-05/2021/NIA/RNC میں اہم ملزم کے طور پر نامزد کیا گیا ہے۔ این آئی اے نے یہ مقدمہ دسمبر 2021 میں ازخود (سو موٹو) درج کیا تھا۔

تحقیقات کے دوران معلوم ہوا کہ چندن کمار، جسے این آئی اے نے جنوری 2026 میں ممبئی سے گرفتار کیا تھا، سی پی آئی (ماؤ نواز) کے لیے فنڈ جمع کرنے میں سرگرم کردار ادا کر رہا تھا۔ تفتیش میں یہ بھی انکشاف ہوا کہ وہ پرانے کیڈروں کو دوبارہ تنظیم میں شامل ہونے کی ترغیب دے کر مگدھ زون میں تنظیم کو دوبارہ فعال کرنے اور تشدد کے ذریعے اس کے نظریے کو فروغ دینے کی کوشش کر رہا تھا۔

این آئی اے کے مطابق، تحقیقات سے یہ بھی سامنے آیا کہ ٹھیکیداروں سے بڑی مقدار میں رقم جبراً وصول کی گئی، جسے مختلف ذرائع سے تنظیم تک پہنچایا گیا۔ ایجنسی نے بتایا کہ سی پی آئی (ماؤ نواز) کے سینئر اے سی سی (SAC) رکن پردیومن شرما، ملزم ابھی نو، چندن کمار اور ایف آئی آر میں نامزد دیگر افراد اس مبینہ سازش کا حصہ تھے۔ بیان میں کہا گیا ہے کہ این آئی اے اس معاملے کی مزید تحقیقات جاری رکھے ہوئے ہے۔