نئی دہلی: آل انڈیا مسلم پرسنل لا بورڈ نے ہفتے کے روز کہا کہ بھوج شالہ – کمال مولا مسجد کے تنازعے میں مدھیہ پردیش ہائی کورٹ کا فیصلہ 1991 کے پوجا ستھل قانون کی اصل روح کے خلاف ہے اور مسلم فریق اسے سپریم کورٹ میں چیلنج کرے گا۔

بورڈ کے ترجمان سید قاسم رسول الیاس نے ایک بیان میں کہا کہ یہ فیصلہ تاریخی حقائق، سرکاری ریکارڈ، آثار قدیمہ کے شواہد اور حتیٰ کہ انڈین آرکیالوجیکل سروے (ASI) کے سابقہ موقف کے برخلاف ہے۔ انہوں نے کہا، "کمل مولا مسجد کمیٹی اس فیصلے کو سپریم کورٹ میں چیلنج کرے گی اور بورڈ اس قانونی لڑائی میں ہر ممکن تعاون فراہم کرے گا۔

" الیاس نے مزید کہا کہ یہ فیصلہ پوجا ستھل ایکٹ، 1991 کی اصل روح اور آئینی ہدایات کے ساتھ براہِ راست متصادم ہے۔ انہوں نے کہا، "انڈین آرکیالوجیکل سروے نے اس مقام کی مشترکہ مذہبی نوعیت کو تسلیم کیا تھا۔ دہائیوں تک ASI کے سرکاری ریکارڈ اور سائن بورڈ نے اس مقام کو 'بھوج شالہ / کمل مولا مسجد' کے طور پر ظاہر کیا، جو اس کی متنازعہ اور مشترکہ مذہبی حیثیت کی سرکاری شناخت تھی۔

اس کے علاوہ، 2003 کے انتظامی حکم کے تحت ہندوؤں کو منگل کو عبادت کرنے اور مسلمانوں کو جمعہ کے دن نماز ادا کرنے کی اجازت دی گئی تھی۔" انہوں نے افسوس کا اظہار کرتے ہوئے کہا کہ عدالت اس معاملے میں مستند تاریخی اور سرکاری ریکارڈ کو مناسب اہمیت دینے میں ناکام رہی۔

مدھیہ پردیش ہائی کورٹ کی انڈور بینچ نے جمعہ کو اپنے فیصلے میں بھوج شالہ – کمل مولا مسجد کمپلیکس کی مذہبی نوعیت وگدیوِی (سرسوتی) مندر کے طور پر طے کی۔ ہائی کورٹ نے 242 صفحات کے تفصیلی فیصلے میں ASI کے 7 اپریل 2003 کے حکم کو بھی منسوخ کر دیا، جس کے تحت مسلمانوں کو ہر جمعہ کو کمپلیکس میں نماز ادا کرنے کی اجازت تھی۔