نئی دہلی: مرکزی وزیر برائے رہائش و شہری امور منوہر لال کھٹر نے ہفتہ کے روز بھلسوا لینڈفل کا دورہ کیا اور کہا کہ اس مقام سے تمام کچرا 31 دسمبر تک مکمل طور پر ہٹا دیا جائے گا۔ کھٹر نے بتایا کہ اس وقت لینڈفل پر تقریباً 12 سے 13 لاکھ میٹرک ٹن پرانا کچرا باقی ہے، جبکہ 2022 میں کام شروع ہونے کے بعد اب تک تقریباً 99.92 لاکھ میٹرک ٹن کچرا صاف کیا جا چکا ہے۔

دورے کے دوران صحافیوں سے گفتگو کرتے ہوئے انہوں نے کہا کہ انہوں نے گزشتہ سال 17 ستمبر کو اس منصوبے کی ذمہ داری سنبھالی تھی۔ انہوں نے کہا، "ہم نے اس منصوبے کی نگرانی کے لیے سینئر افسران کو تعینات کیا ہے تاکہ لینڈفل کو جلد از جلد صاف کیا جا سکے۔" انہوں نے مزید کہا، "میں نے تمام وزراء سے کہا ہے کہ وہ ایک ایک ڈمپ سائٹ کی براہِ راست نگرانی کریں تاکہ ان کی صفائی اور بحالی کا کام جلد مکمل ہو سکے۔"

منوہر لال کھٹر نے بتایا کہ بھلسوا لینڈفل کا آغاز 1994 میں ہوا تھا، مگر تقریباً تین دہائیوں تک اسے نظر انداز کیا جاتا رہا۔ انہوں نے کہا کہ گزشتہ ایک سال کے دوران مسلسل بایو مائننگ کے باعث لینڈفل کی اونچائی اور حجم میں نمایاں کمی آئی ہے۔ ان کے مطابق باقی ماندہ کچرے کی صفائی کے لیے ٹینڈر جاری کرنے کا عمل 7 اگست سے شروع ہوگا اور امید ہے کہ باقی ماندہ پرانے کچرے کی صفائی آئندہ دو ماہ میں مکمل کر لی جائے گی۔

بھلسوا، غازی پور اور اوکھلا کے ساتھ دہلی کے تین بڑے پرانے لینڈفل مقامات میں شامل ہے، جہاں زمین کی بحالی اور ماحولیاتی خطرات کم کرنے کے لیے بایو مائننگ اور ری میڈی ایشن کا کام جاری ہے۔ حکام کے مطابق متعدد تاخیر کے بعد اب اوکھلا اور بھلسوا لینڈفلز کو دسمبر 2026 تک جبکہ غازی پور لینڈفل کو دسمبر 2027 تک مکمل طور پر صاف کرنے کا ہدف مقرر کیا گیا ہے۔